Telegram асосчиси Павел Дуров америкалик журналист Такер Карлсонга интервью берди. Унда Дуров биринчи марта 2024 йилда Францияда ҳибсга олингани ҳақида гапирган. Бу ҳақда NUR Kazakhstan хабар берди.
“Аввалига биз гўёки юридик сўровларга жавоб бермаганимизни айтишди, аммо бу ёлғон. Шундай бўлган тақдирда ҳам, “иштирокчилик” тушунчасининг талқини ниҳоятда хато. Адвокатларнинг айтишича, прецедентлар деярли йўқ”, деди Дуров.
Унинг сўзларига кўра, Францияда у “банк ҳисобварақларисиз, аудитсиз” каби даъволар билан айбланган. Аммо Telegram “мутлақо бошқа даража: миллиард фойдаланувчи, аудит, шаффофлик” дея қўшимча қилган. У Франция расмийларининг “миллиардлаб Telegram фойдаланувчилари орасида ноқонуний фаолият билан шуғулланганлар борлиги” ҳақидаги айбловларини бемаънилик деб ҳисоблайди.
“Бу 350 миллион америкаликдан бири жиноят содир этгани учун Дональд Трампни ҳибсга олишга ёки Макронни Тулузадаги талончиликда айблаб қамоққа тиқишга ўхшайди. Бу ўта бемаънилик”, дейди Telegram асосчиси.
Унинг сўзларига кўра, ҳибсдалигига қарамай, у ўз қоматини сақлаб қолишга ва парҳезга риоя қилишга муваффақ бўлган. Спорт зали йўқ бўлса ҳам, у ўз камерасида жисмоний машқлар билан шуғулланган.
“Менга овқатланиш масаласида истисно қилишганга ўхшайди. Ҳаммаси жойида эди. Мен гўшт ва фастфуд емайман. Менга балиқ беришди”, деди Дуров.
Павел Дуров 2024 йилнинг 24 август куни Париждаги Ле Бурже аэропортида қўлга олинганди. Унга қўйилган айбловлар бўйича 20 йилгача қамоқ жазосига ҳукм қилиниши мумкин. Ҳибсга олинганидан сўнг, мессенжер жамоаси баёнот бериб, компания бош директорнинг яширадиган ҳеч нарсаси йўқлигини билдирган.
26 август куни Париж прокуратураси Дуровга қарши иш 8 июль куни очилганини ва унга 12 та жиноят бўйича айблов қўйилганини маълум қилган. Улар орасида: ҳокимият органлари билан ҳамкорлик қилишдан бош тортиш, вояга етмаганларнинг порнографик тасвирларини сақлаш ва тарқатишда иштирок этиш, гиёҳвандлик воситаларини олиш, ташиш, сақлаш, сотиш ёки ўтказишда иштирок этиш, уюшган гуруҳ таркибида фирибгарликда иштирок этиш, криптовалюта воситаларидан фойдаланиш, кабилар мавжуд.
Кейинчалик маълум бўлишича, бизнесмен катта гаров эвазига қўйиб юборилган, бироқ Францияни тарк этиши тақиқланган. Франциялик жиноий ишлар бўйича адвокат Девид Либескинднинг фикрича, Дуровнинг суди 3-4 йилга чўзилиш эҳтимоли бор. Бироқ Дуров назоратни янада юмшатишни сўраши мумкин.
6 сентябрь куни Дуров Франциядаги аэропортда ҳибсга олинганидан кейин биринчи марта алоқага чиққан — ўз каналида пост эълон қилган. Тадбиркор барчани қўллаб-қувватлагани ва меҳр-муҳаббати учун миннатдорлик билдириб, мавжуд вазият бўйича ўз қарашлари билан ўртоқлашган.
Дуров ҳибсдан озод этилгач, Telegram модерация сиёсатини янгилагани маълум бўлди: мессенжер энди модераторларга чатлар ва хусусий гуруҳлардаги “ноқонуний контент” ҳақида хабардор бўлиш имконини беради.
Кейинроқ француз оммавий ахборот воситалари Telegram Павел Дуров ҳибсга олинганидан кейин Франция расмийларининг қонуний сўровларига жавоб беришни бошлагани, полицияга бир нечта жиноий ишлар бўйича сўровлар бўйича материаллар тақдим этгани ҳақида хабар берган.
Изоҳ (0)