Америка Қўшма Штатлар маъмурияти ноқонуний муҳожирларни “хавфли мамлакатлар”га чиқариб юборишга интилмоқда. Бу ҳақда Тhе Intercept портали хабар бермоқда.
Порталнинг таъкидлашича, Вашингтон чиқариб юбориш учун атайлаб “хавфли жойлар”ни изламоқда. Бу тобора мигрантларни узоқ ва кўпинча жуда хавфли мамлакатларга жўнатиш таҳдиди билан қўрқитишга ўхшаб қолмоқда.
Маълумотларга кўра, АҚШнинг Кубадаги Гуантанамо базасидаги қамоқхоналардан фойдаланиш билан бир қаторда, АҚШ президенти Дональд Трамп маъмурияти “келиб чиқиш мамлакатидан қатъи назар, чиқариб юборилганларни сақлаш учун узоқроқ жойларни топишга уринмоқда”.
Тахминларга кўра, АҚШ 19 та давлат билан “шартнома тузиш имкониятини кўриб чиққан, тузишга уринган ёки тузган”. Улар орасида Ангола, Бенин, Гондурас, Ливия, Мексика, Молдова, Мўғулистон, Руанда, Ўзбекистон ва Украина бор.
Портал манбасининг айтишича, ҳукумат вакиллари яқин ҳафталар ичида чиқариб юбориш рейсларини сезиларли даражада кўпайтиришни режалаштирмоқда.
Давлат департаменти порталга “оммавий ва ноқонуний миграция инқирозига барҳам бериш учун АҚШ ҳамкорлари ва минтақавий етакчилар билан яқиндан ҳамкорлик қилаётгани”ни маълум қилган. Шу билан бирга, улар муайян давлатлар билан дипломатик алоқалар ҳақида изоҳ беришдан бош тортган.
Изоҳ (0)