Колумбия пойтахти Боготада 8 июнь куни Рихтер шкаласи бўйича 6,5 магнитудали зилзила содир бўлди. Бу ҳақда Euronews хабар берди.
Зилзила 10 км чуқурликда қайд этилган ва у мамлакатнинг катта қисмида сезилган. Қурбонлар ҳақида хабар берилмаган. Зилзила маҳаллий вақт билан соат 08:08 да пойтахт Боготадан тахминан 186 километр жануби-шарқда жойлашган Паратебуэно шаҳридан 17 километр шимоли-шарқда содир бўлган.
Колумбия Геология хизмати худди шу ҳудудда бир неча дақиқадан сўнг магнитудаси 4 дан 4,6 гача бўлган қўшимча силкинишлар содир бўлганини маълум қилган. Табиий офатлар хавфини бошқариш миллий бўлими Х тармоғида бир нечта ҳудудларда вазиятни баҳолаётганини айтган.
Колумбия Тинч океани оловли ҳалқасида жойлашган бўлиб, бу ҳудудда тез-тез сейсмик ва вулқон фаоллиги содир бўлиб туради.
Олдинроқ Туркиянинг жануби-ғарбий соҳилларида ҳам 5,8 магнитудали зилзила содир бўлгани ҳақида хабар берилган эди. Зилзила эпимаркази Эгей денгизида, Мармарис шаҳридан 10,43 км узоқликда бўлган. Ўчоқ эса 67,91 километр чуқурликда жойлашган эди. Муғла губернатори Идрис Оқбийиқ зилзиладан кейин ваҳимага тушиб баландликдан сакраган 34 киши жароҳатланганини айтган. Жами жароҳатланганлар сони 69 кишини ташкил этган. Ер силкиниши туфайли 14 ёшли бола ваҳимага тушиб, вафот этган. Жами 55 киши шифохоналарга мурожаат қилган. 14 нафар одам шифохонага боришга рози бўлмай, жойида даволанган.
Изоҳ (0)