Шимолий Корея яқин орада Россияга қўшимча ҳарбий контингент юборишни режалаштирмоқда. Улар Украинага қарши урушда иштирок этади. Бу ҳақда Жанубий Корея Қўшма штаблар қўмитасига таяниб, Reuters хабар берди.
Қўмита урушда шимолий кореялик аскарларнинг сезиларли йўқотишларига қарамай КХДР яна ҳарбий юборишини маълум қилди.
“Россия-Украина урушига қўшинлар жўнатилганига тўрт ой бўлди ва кўплаб қурбонлар ҳамда асирлар қайд этилди. Шу сабабли, Шимолий Корея кейинги чораларни тезлаштириши ва қўшимча қўшинлар жўнатишга тайёргарлик кўраётгани прогноз қилинмоқда”, дейди Жанубий Корея ҳарбий идораси.
Бироқ, идора яна қандай чоралар кўрилиши мумкинлиги ҳақида аниқ маълумот бермади. КХДР жосус сунъий йўлдоши ва қитъалараро баллистик ракетани учиришга тайёргарлик кўраётгани ҳақида хабарлар мавжуд. Аммо бундай чоралар учун зудлик билан ҳаракат қилиш белгилари кузатилмаган.
Украина ва Ғарб маълумотларига кўра, рус армиясини қўллаб-қувватлаш учун 11 мингга яқин КХДР аскари Курск вилоятига жойлаштирган. Киев маълумотларига кўра, уларнинг 3000 нафардан ортиғи ҳалок бўлган ёки яраланган.
Москва ва Пхеньян дастлаб Шимолий Кореянинг қўшинларини жойлаштириш ҳақидаги хабарларни рад этган бўлса-да, Россия президенти Владимир Путин октябрь ойида улар Россияда эканини рад этмаган.
КХДРдан Украинадаги урушга юборилган аскарлар
Жанубий Корея ва АҚШнинг ҳисоб-китобларига кўра, Шимолий Корея Россияга 10 мингдан ортиқ аскар юборган. Улардан баъзилари аллақачон Курск вилоятидаги жангларда қатнашган. Украина президенти Владимир Зеленский урушга юборилган Шимолий Корея аскарлари сони 100 мингга етиши мумкинлиги ҳақида огоҳлантирган. Сеул маълумотларига кўра, КХДР Россияга оғир артиллерия – ўзиюрар гаубицалар ва кўплаб ракета тизимларини ҳам етказиб беради.
Россия ва Шимолий Корея уруш бошланганидан кейин ҳарбий соҳадаги ҳамкорликни кучайтира бошлади. 2024 йил июнь ойида Россия президенти Владимир Путин Шимолий Кореяга ташриф буюриб, Ким Чен Ин билан ҳужум содир бўлган тақдирда бир-бирини қўллаб-қувватлашни назарда тутувчи, шунингдек, Ғарб санкцияларига қарши ҳамкорликни ўз ичига олган кенг қамровли стратегик шартнома имзолаганди.
Украина армияси Курск вилоятида шимолий кореялик икки аскарни асирга олган. Президент Владимир Зеленский 12 январь куни улар сўроққа тутилгани акс этган видеони эълон қилди. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлаган.
Изоҳ (0)