Шимолий Корея ҳарбийлари 9 май куни Москвада бўлиб ўтадиган Ғалаба парадида иштирок этади, деб ёзади Япониянинг NHK нашри манбаларга таяниб.
Нашр суҳбатдошларига кўра, парадда КХДР ҳарбийларининг иштироки тўғрисида қарор қабул қилинган. Уларнинг сўзларига кўра, гап ўнлаб ҳарбий хизматчилар ҳақида кетмоқда.
NHKънинг бошқа манбаларининг аниқлик киритишича, август ойи охирида Шимолий Корея ҳарбий оркестри ҳам Москвадаги мусиқий тадбирда иштирок этади.
Шимолий Корея ҳарбийларининг Москвадаги Ғалаба парадидаги иштироки биринчи марта экани айтилмоқда.
Россия мудофаа вазири Андрей Белоусов бу йил уруш тугаганининг 80 йиллиги муносабати билан Москвада, саккизта қаҳрамон шаҳарда ва ҳарбий штаблар жойлашган яна ўн тўққизта шаҳарда ўтказиладиган Ғалаба парадига тайёргарлик бошланганини эълон қилган эди. Унинг сўзларига кўра, парадга 19 та “дўст” давлатдан ҳарбий бўлинмалар таклиф қилинган ва улардан 10 таси, шу жумладан собиқ СССРнинг етти мамлакати ўз иштирокини тасдиқлаган.
Россиядаги шимолий кореялик аскарлар
Украина ҳукумати 2024 йилнинг октябрь ойида жанговар ҳаракатлар ҳудудида шимолий кореялик ҳарбийлар борлигини қайд этганди. Бу маълумотни Жанубий Корея разведкаси ва АҚШ Мудофаа вазирлиги ҳам тасдиқлаган. Украина ва унинг ғарблик иттифоқчилари маълумотларига кўра, КХДР Россияга камида 10 минг аскар юборган.
New York Times’га кўра, шимолий кореялик ҳарбийлар ва Украина кучлари ўртасидаги дастлабки тўқнашувлар 2024 йил ноябрь ойида Курск вилоятида юз берган. Зеленский 9 январь куни Рамштайнда бўлиб ўтган Украина бўйича йиғилишда сўзга чиқиб, Шимолий Корея Курск вилояти ҳудудида 4 минг аскарини йўқотганини айтган.
Жанубий Корея разведкасига кўра, КХДР томонидан 300 га яқин аскар ҳалок бўлган ва 2700 киши яраланган. КХДР ҳукумати ўз аскарларини асирликдан қочиш учун ўзини портлатиб, ўз жонига қасд қилишга чақирмоқда.
Асирга олинган аскарлар уларни Жанубий Кореяга кўчириш тўғрисида ҳеч қандай илтимос билдирмаган. Гарчи Сеул бундай сўровлар келиб тушса, Киев билан ҳамкорлик қилишга тайёр, дея хабар берган Yonhap.
Украина армияси Курск вилоятида шимолий кореялик икки аскарни асирга олганди. Президент Владимир Зеленский 12 январь куни улар сўроққа тутилгани акс этган видеони эълон қилди. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлаган.
Изоҳ (0)