Швейцариялик тадқиқотчилар омега-3 ни ҳар куни истеъмол қилиш танадаги табиий қариш жараёнини секинлаштиришини исботлади. Илмий тадқиқотда 70 ва ундан катта ёшдаги 777 нафар инсон иштирок этди. Олимлар томонидан берилган натижалар Nature Aging журналида чоп этилди.
Уч йил давомида ҳар куни бир грамм омега-3 истеъмол қилган соғлом кексаларнинг биологик ёши бошқа иштирокчиларга қараганда уч ойга ёшроқ бўлиши аниқланди. Бундан ташқари, рационга D витаминини қўшиш ва жисмоний машқлар (ҳафтада уч марта 30 дақиқадан) ушбу натижани тўрт ойга оширди.
Олимлар омега-3 нинг қариш тезлигига таъсирини баҳолаш учун эпигенетик соатлар деб номланувчи биологик воситалардан фойдаланди.
Эпигенетик соат бу тўқималар, ҳужайралар ва органларнинг биологик ёшини аниқлашга имкон берувчи махсус ДНК белгилари тўпламидир.
“Фикримча, 70 ёш бу иккинчи бор 50 ёшга тўлишга ўхшайди. Албатта, бу усул қаришнинг даво бўл олмайди, аммо тадқиқот натижалари ушбу усулнинг қанчалик самарали эканлигини тасдиқлайди. Омега-3 ва D витаминининг кичик дозаларини мунтазам равишда қабул қилиш ва жисмонан фаоллик ҳақиқатда инсон умрини узайтиради”, дейди Altos Labs биотехнология компанияси тадқиқотчиси Стив Ҳорват.
Бундан аввалги тадқиқотларда ҳам ёғли балиқ, ёнғоқлар, уруғлар каби озиқ-овқатларда мавжуд бўлган омега-3 қариш жараёнини секинлаштириши аниқланган эди. Бироқ яқин вақтгача уни қўшимча витамин шаклида қабул қилиш орқали ҳам ижобий натижаларга эришиш мумкинлиги номаълум эди.
Шунингдек, олимлар омега-3 ёғ кислоталарининг бошқа фойдали хусусиятларини ҳам қайд этди. Хусусан, ушбу модда кекса одамларда тўсатдан йиқилиш ҳолатларини 10% га камайтиради, инфекцияларга чалиниш хавфини эса 13% га туширади. Бундан ташқари, омега-3, Д витамини ва мунтазам жисмоний машқлар инвазив саратон касалликларини 61 фоизга камайтирди.
Изоҳ (0)