AQSH 21-may kuni Rossiyaga yetib bora oladigan Minuteman III qit’alararo ballistik raketasini rejali sinovdan o‘tkazdi. Bu haqda Deutsche Welle xabar berdi.
Parvoz Kaliforniya shtatidagi Vandenberg aviabazasida amalga oshirilgan.
Ushbu sinov uchirilishi muntazam va davriy tadbirlarning bir qismi hisoblanadi. U Qo‘shma Shtatlarning yadroviy to‘xtatish quroli XXI asr tahdidlarini jilovlashda xavfsiz, ishonchli va samarali ekanini namoyish etish hamda ittifoqchilarimizni xotirjam qilish maqsadida o‘tkazildi, deyiladi xabarda.
Raketa bitta Mark-21 High Fidelity De-Entry jangovar kallagi bilan jihozlangan. Raketaning bosh qismi Tinch okeanining markaziy qismidagi raketaga qarshi mudofaa sinov maydonigacha taxminan 6 700 kilometr masofani bosib o‘tgan.
Minuteman III qattiq yoqilg‘ili qit’alararo ballistik raketasi 1970-yildan beri AQSH armiyasida mavjud. Uning og‘irligi taxminan 36 tonna, maksimal parvoz masofasi 9 500 kilometrdan ortiq, tezligi esa soatiga 24 ming kilometrdan oshadi. Bu AQSH strategik yadroviy kuchlari tarkibidagi yagona shaxtaga asoslangan qit’alararo ballistik raketasidir.
Ayni paytda Qo‘shma Shtatlar har biri uchtagacha yadro kallagini olib yurishga qodir 400 ta shunday raketaga ega, deyiladi AQSH harbiy-havo kuchlari saytida.
Qo‘mondonlik ta’kidlashicha, Minuteman III hali ham AQSHning strategik to‘xtatuvchi kuchlari asosini tashkil etadi.
Rossiyaga yetib bora oladigan Minuteman III raketasini sinovdan o‘tkazish Rossiya Xavfsizlik kengashi raisi o‘rinbosari Dmitriy Medvedevning G‘arbga jahon urushi bilan tahdid qilgan bayonotidan ko‘p o‘tmay amalga oshirildi. Medvedev 20-may kuni Peterburg xalqaro yuridik forumida so‘zlagan nutqida G‘arb davlatlarining Moskvaga nisbatan siyosati dunyoni uchinchi jahon urushiga olib borayotganini ta’kidladi.
U Rossiyaning Ukrainaga bostirib kirishi haqida gapirmagan holda, Kiyevni qo‘llab-quvvatlovchi davlatlarni ushbu mamlakat hududidagi har qanday tinchlikparvar kuchlar Rossiya armiyasi uchun “qonuniy harbiy nishon” sifatida ko‘rilishi haqida ogohlantirdi.
Izoh (0)