Бундесвер (Германия Қуролли кучлари) Россия билан ҳарбий тўқнашув юз берган тақдирда амалга ошириладиган махсус режа тайёрлади.
Бу ҳақда Frankfurter Allgemeine Zeitung газетаси маълум қилди.
1000 саҳифадан иборат режада алоҳида ҳимояга лойиқ барча инфратузилма рўйхати келтирилган. Шунингдек, режа Россияни НАТОнинг шарқий қанотида ушлаб туриш учун зарур бўлган ҳаракатлар йиғиндисини ўз ичига олади.
Режада таъкидланишича, бу ҳолда Германия ҳарбий техника, озиқ-овқат ва дори-дармонлар захираси жамланадиган, “ўн минглаб, эҳтимол, юз минглаб қўшинлар юбориладиган марказ”га айланади.
Июль ойида Билд газетаси Бундесвер НАТО қўшинларини альянснинг шарқий жабҳасига ўтказиш зарур бўлган тақдирда ҳарбий ва фуқаролик ҳокимият органларининг ҳаракат йўналишини белгилаб берувчи махфий режани ишлаб чиққани ҳақида хабар берган эди.
“Учинчи жаҳон уруши бошланди”
Аввалроқ Украина армиясининг собиқ бош қўмондони Валерий Залужний учинчи жаҳон уруши расман бошланганини айтганди.
У 2024 йилда Украина қаршисида энди Россия эмас, бошқа давлат турганини маълум қилди.
"Украина қаршисида Шимолий Корея аскарлари турибди. Келинг, очиғини айтайлик. Аллақачон Эрон Shahedълари тинч аҳолини очиқчасига, ҳеч нарсадан уялмасдан ўлдирмоқда. Украинага аллақачон айнан Шимолий Кореяда ишлаб чиқарилган ракеталар учиб келмоқда ва улар буни очиқ-ойдин эътироф этмоқда", деди собиқ қўмондон.
Урушда кескинлик ошди
19 ноябрь куни Украина армияси Россия ҳудудига АҚШнинг узоқ масофага учувчи ATACMS ракеталари билан зарба берди. Ҳужум Брянск вилояти Карачев шаҳридаги ҳарбий объектга қаратилди.
Бунга жавобан 21 ноябрь куни Россия илк бор Украинанинг Днепр шаҳри бўйлаб қитъалараро баллистик ракета учирди. Ҳужум Астрахан вилоятидаги полигондан амалга оширилган.
18 ноябрь куни АҚШ президенти Жо Байден Украинага ATACMS ракеталари билан Россия ҳудудига зарба йўллашга рухсат берганди.
Изоҳ (0)