Украина армияси 25 ноябрь куни Курск-Восточний аэродромига Америкада ишлаб чиқарилган саккизта ATACMS ракеталарини учирди. Уларнинг еттитаси уриб туширилди, биттаси нишонга етди. Бу ҳақда Россия Мудофаа вазирлиги хабар берди.
Еттита ракета С-400 ва “Пансир” зенит-ракета тизими билан уриб туширилган. Ракета парчаларининг тушиши оқибатида икки нафар ҳарбий хизматчи енгил жароҳат олди, инфратузилма объектларига арзимас даражада зарар етказилди, дейилади хабарда.
Россия Мудофаа вазирлиги ATACMS ракеталари билан қилинган ҳужум учун жавоб чоралари кўрилаётганини маълум қилди.
Вазирлик сўнгги уч кун ичида Украина армияси Курск вилоятидаги объектларга узоқ масофали Ғарб қуроллари билан иккита зарба берганини айтди: 23 ноябрь куни Лотаревка ҳудудида С-400 зенит-ракета дивизиони позициясига АҚШда ишлаб чиқарилган бешта ATACMS ракетаси учирилган.
Украина АҚШ қуроллари билан Россияга зарба бера олади
17 ноябрь куни АҚШ президенти Жо Байден Украинага АҚШ томонидан етказиб берилган узоқ масофали ATACMS ракеталаридан Россия ҳудудига зарба бериш учун фойдаланишга рухсат берди. 19 ноябрь куни АҚШ давлат департаменти вакили Брайан Николс маълумотни расман тасдиқлади.
Байден маслаҳатчиларининг ATACMS’дан фойдаланиш бўйича фикрлари турлича. Дональд Трамп президентлик лавозимини эгаллаганидан кейин Байденнинг бу қарорини бекор қиладими ёки йўқ, ҳозирча номаълум.
Украина ATACMS билан Россияга илк бор зарба берди
19 ноябрь куни Украина армияси Россия ҳудудига АҚШнинг узоқ масофага учувчи ATACMS ракеталари билан зарба берди. Ҳужум Брянск вилояти Карачев шаҳридаги ҳарбий объектга қаратилган. ATACMS’нинг максимал учиш масофаси 300 километрни ташкил қилади.
Россиянинг жавоб ҳужуми
21 ноябрь куни Россия илк бор Украинанинг Днепр шаҳри бўйлаб қитъалараро баллистик ракета учирди. Ҳужум Астрахан вилоятидаги полигондан амалга оширилган. Қитъалараро баллистик ракета беш минг километр масофани босиб ўтиши мумкин, аммо уларнинг баъзилари тўққиз минг километрдан ортиқ масофага мўлжалланган.
Дастлаб ракета ҳужуми ҳақида Украина Қуролли кучлари хабар берган. Кейинчалик маълумотни Россия президенти тасдиқлаган. Путинга кўра, Россия Америка ва Британияда ишлаб чиқарилган қуролларнинг мамлакат ҳудудига ҳужумларига жавобан “Орешник” ракетасидан фойдаланган.
Изоҳ (0)