АҚШ ҳукумати Амерка паспортини олиш учун курашаётган муҳожирлар ҳақида шоу суратга олиш ғоясини илгари сурмоқда. Бу ҳақда Daily Mail хабар бермоқда.
Маълум қилинишича, АҚШ ички хавфсизлик вазири Кристи Ноэм фуқароликка номзодлар “тезлаштирилган АҚШ фуқаролигини олиш имтиёзи учун” бир-бири билан беллашадиган кўрсатув ғоясини маъқуллаган ва шоу лойиҳасини ишлаб чиқишда иштирок этган.
Бундан ташқари, Ноэм АҚШ Фуқаролик ва иммиграция хизмати амалдорларига телевизион танловда овозларни ҳисоблашни таклиф қилган.
Ғоя муаллифи илгари бир нечта телекўрсатувлар устида ишлаган продюсер ва сценарий муаллифи, канадалик Роб Уорсофф ҳисобланади.
“Мен ҳеч қандай сиёсий мафкурага боғлиқ эмасман. Собиқ муҳожир сифатида мен шунчаки иммиграция жараёнини улуғлайдиган, америкалик бўлиш нимани англатишини кўрсатадиган ва америкалик бўлишни энг кўп истайдиган одамлар нигоҳи орқали умуммиллий суҳбат олиб борадиган шоу яратишга ҳаракат қиляпман”, деди у лойиҳа тавсифида.
Уорсоффнинг режаларига кўра, “Америкалик” шоусида иштирокчилар поездда мамлакат бўйлаб саёҳат қилишади ва ҳар бир минтақада синовдан ўтишади. Висконсинда ёғоч ғўлаларини думалатиш, Сан-Франциско конида олтин қазиб олиш ёки NASА марказида ракета учириш каби минтақавий “маданий” мусобақаларда қатнашадилар.
Лойиҳа ғолиби Вашингтондаги Капитолий зинапояларида тўғридан-тўғри эфирда қасамёд қилади.
Ғолиб АҚШ фуқароси бўлиш имкониятига эга бўлади ва “америкача сахийлик билан” миллион авиамил ёки умрбод бензин захирасигача бўлган совринларни қўлга киритади. Бошқа иштирокчилар ҳам фуқароликни соддалаштирилган тартибда олиш учун дастлабки текширувдан ўтишади.
Та`кидланишича, вазирликдаги айрим ходимлар муҳожирларнинг оғир аҳволи шоу элементига айланиб бораётганидан хавотирда эканлигини билдиришган.
Идора бир неча ҳафтадан бери стриминг ҳамкорини қидирмоқда, вариантлар орасида Netflix платформаси ҳам бор. Аввалги шунга ўхшаш уринишлар муваффақиятсизликка учраган бўлса-да, лойиҳа жамоаси муваффақиятга умид қилмоқда.
Изоҳ (0)