Украина армиясининг собиқ бош қўмондони Валерий Залужний учинчи жаҳон уруши расман бошланганини айтди. Бу ҳақда “Украинская правда” хабар берди.
Менинг фикримча, 2024 йилда учинчи жаҳон уруши бошланганини мутлақ аниқлик билан айта оламиз, деди ҳозирда Украинанинг Британиядаги элчиси вазифасини бажараётган Залужний.
У 2024 йилда Украина қаршисида энди Россия эмас, бошқа давлат турганини маълум қилди.
Украина қаршисида Шимолий Корея аскарлари турибди. Келинг, очиғини айтайлик. Аллақачон Эрон Shahed’лари тинч аҳолини очиқчасига, ҳеч нарсадан уялмасдан ўлдирмоқда. Украинага аллақачон айнан Шимолий Кореяда ишлаб чиқарилган ракеталар учиб келмоқда ва улар буни очиқ-ойдин эътироф этмоқда, деди собиқ қўмондон.
У ҳозирда Шимолий Корея ва Хитой қуроллари ёрдамида ҳужум қилинаётганини таъкидлади. Залужний Украина иттифоқчиларини тўғри хулосалар чиқаришга чақирди ва қўшимча қилди:
Буни шу ерда, Украина ҳудудида тўхтатиш мумкин. Лекин негадир ҳамкорларимиз буни тушунишни истамаяпти. Шубҳасизки, Украинанинг душманлари жуда кўп. Украина технологиялар ёрдамида омон қолади, аммо у бу жангда ёлғиз ғалаба қозониши аниқ эмас, деди Залужний.
Украинадаги сўнгги вазият
19 ноябрь куни Украина армияси Россия ҳудудига АҚШнинг узоқ масофага учувчи ATACMS ракеталари билан зарба берди. Ҳужум Брянск вилояти Карачев шаҳридаги ҳарбий объектга қаратилган. ATACMS’нинг максимал учиш масофаси 300 километрни ташкил қилади.
АҚШ президенти Жо Байден 17 ноябрь куни мазкур ракетани Россия ичкарисига қўллашга рухсат берди. Украина узоқ вақтдан бери Ғарб қуроллари билан Россия ҳудудига зарба беришга рухсат этилишини кутаётганди. Кремль раҳбари Владимир Путин эса бундай қуролларни Россияга қарши қўллаш урушга киришишни англатишидан огоҳлантирган.
21 ноябрь куни Россия илк бор Украинанинг Днепр шаҳри бўйлаб қитъалараро баллистик ракета учирди. Ҳужум Астрахан вилоятидаги полигондан амалга оширилган. Қитъалараро баллистик ракета беш минг километр масофани босиб ўтиши мумкин, аммо уларнинг баъзилари тўққиз минг километрдан ортиқ масофага мўлжалланган.
Дастлаб ракета ҳужуми ҳақида Украина Қуролли кучлари хабар берган. Кейинчалик маълумотни Россия президенти тасдиқлаган. Путинга кўра, Россия Америка ва Британияда ишлаб чиқарилган қуролларнинг мамлакат ҳудудига ҳужумларига жавобан “Орешник” ракетасидан фойдаланган.
Изоҳ (0)