Америка Қўшма Штатлари президенти Дональд Трамп ва мудофаа вазири Пит Хегсет 20 май куни коинотга қурол-яроғ олиб чиқишни кўзда тутувчи “Олтин гумбаз” режасини эълон қилди. Бу ҳақда Al Jazeera хабар берди.
Оқ уйда нутқ сўзлаган Трамп гипертовушли ва баллистик ракеталар ҳамда илғор қанотли ракеталарни уриб туширишга мўлжалланган тизим учун архитектура танлаганини маълум қилди.
“Мен Америка халқига ватанимизни хорижий ракета ҳужуми таҳдидидан ҳимоя қилиш учун энг замонавий қалқон қуришга ваъда берган эдим. Олтин гумбаз тўлиқ қуриб битказилгач, ракеталар дунёнинг исталган бурчакларидан учирилганда, ҳаттоки коинотдан учирилса ҳам уларни уриб туширишга қодир бўлади. Энг яхши тизим бизда яратилади,” деди Трамп Овал кабинетда журналистларга.
Унинг қўшимча қилишича, “Олтин гумбаз” тизимига космик сенсор ва интерсепторлар киради.
Бундан атиги 4 ой олдин Трамп ушбу дастурни ишлаб чиқувчи фармонни имзолаган эди. Дастурни ҳозирда АҚШ армиясининг космик кучлари космик операциялар бўйича вице-бошлиғи генерал Майкл Гетлейн бошқармоқда.
Тадбирда сўзга чиққан Хегсет режани “Америка ва америкаликлар хавфсизлигига авлод сармояси”, деб атаган.
Оқ уй ракетага қарши мудофаа тизими ҳақида қўшимча маълумотларни дарҳол эълон қилмаган. Пентагон ҳали ҳам унинг имкониятлари ва талабларини ишлаб чиқаётгани айтилмоқда.
Конгресснинг Бюджет бошқармаси шу ой бошида фақат “Олтин гумбаз”нинг космик компонентлари кейинги 20 йил ичида 542 миллиард долларга тушиши мумкинлигини тахмин қилган эди. Космик тизим самарали бўлиши учун айниқса, Шимолий Корея каби хорижий ҳарбийлар тобора такомиллашиб бораётган бир пайтда, кўплаб сенсорлар ва интерсепторлар керак бўлиши таъкидланди.
“Бу дастур менинг президентлик муддатим тугагунга қадар тўлиқ ишга тушиши керак. Шундай экан, буни уч йил ичида амалга оширамиз,” деди Трамп.
Президент умумий харажатларни тахминан 175 миллиард долларга баҳолаган. Тизимни қуриш учун мавжуд мудофаа имкониятларидан фойдаланиш режалаштирилгани қўшимча қилинган.
Трамп ҳозирда ушбу тизим учун 25 миллиард доллар талаб қилинишини тасдиқлади. Аммо бу сумма қисқартирилиши мумкинлиги таъкидланди.
Трамп “Олтин гумбаз” дастурига қайси компаниялар жалб этилишини айтмаган. Бунинг ўрнига, у тизим Аляска, Индиана, Флорида ва Жоржия каби штатларда саноатга туртки беришини таъкидлаган.
Изоҳ (0)