АҚШ Қуролли кучлари 2025-молиявий йили охиригача узоқ масофали гипертовушли қуроллар билан таъминланади. Бу ҳақда Пентагоннинг номи ошкор этилмаган амалдорига таяниб Американинг Defense News нашри хабар берди.
Нашр маълумотларига кўра, Вашингтон штатидаги Льюис-Маккорд қўшма базасига жойлаштирилган 17-артиллерия бригадаси учун ерустки гипертовушли ракеталар назарда тутилмоқда. Таъкидланишича, қуроллар 2023 йил кузигача жойлаштирилиши керак эди, бироқ синовлар пайтида аниқланган муаммолар туфайли бу амалга ошмаган.
2024 йил декабрь ойида Пентагон Флорида штатидаги Канаверал бурнидаги АҚШ космик кучлари базасидан ядровий бўлмаган гипертовушли ракетанинг синовдан муваффақиятли ўтганини маълум қилган эди.
АҚШ Мудофаа вазирлиги расмийлари мамлакат гипертовушли қуроллар ишлаб чиқаришда Россия ва Хитойдан ортда қолганини бир неча бор тан олган. Жорий йилнинг 25 февраль куни АҚШ мудофаа вазирининг биринчи ўринбосари лавозимига номзод Стивен Файнберг Қўшма Штатларнинг ядровий қуроллари эскирганини, Вашингтон учун энг муҳим вазифа уларни модернизация қилиш, шунингдек, гипертовушли тизимларни ишлаб чиқиш эканлигини айтди.
Файнбергнинг таъкидлашича, Россия янги замонавий қуролларни ишлаб чиққан, улар орасида у “Кинжал” гипертовушли авиация ракета мажмуасини санаб ўтган.
Пентагон раҳбари ҳарбий харажатларни 40 фоизга қисқартиришни буюрди
Аввалроқ АҚШ мудофаа вазири Пит Хегсет мудофаа бюджетини кейинги беш йил ичида ҳар йили 8 фоизга ёки жами 40 фоизга қисқартириш режасини ишлаб чиқишни буюрган эди.
Харажатларни қисқартириш режаси 24 февралгача тақдим этилиши керак. Президент Дональд Трамп маъмурияти қисқартирилмайдиган 17 та йўналишни белгилаб берган. Бунга АҚШнинг жанубий чегарасини ҳимоя қилиш операциялари, ядровий арсенал ва ракетага қарши мудофаа тизимларини модернизация қилиш, камикадзе дронлари, сувости кемалари ва ўқ-дориларни сотиб олиш киради.
Изоҳ (0)