Одамлар етарлича ухламаса, 2050 йилга келиб қандай кўринишга эга бўлиши мумкинлигини ғаройиб рақамли модел кўрсатди. Бу ҳақда Daily Mail хабар берди.
Британиялик олимлар кунига 6 соатдан кам ухлайдиган инсонларнинг ташқи кўринишини тасвирлаш учун 45 ёшли британиялик аёл Ҳаннани яратди. Келажакда бу аёл сурункали бел оғриғи, сийрак сочлар, салқиган тери, шишган оёқлар ва қизил қовоқ остлари билан тасвирланган. Бундан ташқари, у қўл ва оёқ мушакларининг заифлашувидан азият чекади ҳамда кучсиз иммун тизими туфайли гриппга тез-тез чалинади. Ҳанна 2050 йилда 45 ёшли аёлни ифодалайди, яъни у ҳозирда уйқусизликнинг зарарли йўлига кирган 20 ёшли қиздир.
Шунингдек, у ёмон хотирага ва заифлашган иммунитет тизимига эга бўлиб, бу уни шамоллаш ва грипп каби нафас йўллари инфекцияларига кўпроқ мойил қилади.
Уйқу бўйича мутахассис доктор Софи Бостокнинг таъкидлашича, шошилинч замонавий турмуш тарзи ва смартфонларга муккасидан кетиш туфайли одамлар кўпроқ уйқуни йўқотмоқда. Шу сабабли 2050 йилга келиб уйқу етишмовчилиги Ҳанна азият чекаётган каби кўплаб муаммоларга олиб келади.
Мутахассислар катта ёшли инсонларга кунига 7-9 соат ухлашни тавсия қилади. 7 соатдан кам ухлайдиган катталар эса соғлиғида муаммоларга дуч келади. Сўровларга кўра, британиялик ўртача тунда атиги 6 соат-у 20 дақиқа ухлайди.
Ҳаннанинг тадқиқоти 2010 йилдан буён академик журналларда чоп этилган 19 та илмий мақолага асосланган бўлиб, улар уйқу етишмаслигининг танага таъсирини ўрганишга бағишланган.
Кўпчилигимиз кундалик тартибсиз иш ва уйқу етишмовчилиги сиркад ритмларимизга, яъни физиологиямизни бошқарадиган 24 соатлик даврларга халақит беришини англамаймиз, дейди доктор Босток.
Тадқиқотлар шуни кўрсатадики, узоқ муддатли уйқу етишмовчилиги юракка таъсир қилиши мумкин бўлган касалликлар хавфини ошириши мумкин. Буларга семизлик, юрак касалликлари ва 2-тур қандли диабет киради.
Олимлар Ҳаннадай кўринмаслик учун қуйидагиларни тавсия қилмоқда:
- суткасига 7-9 соат ухлаш;
- сиркад ритмлари синхрон бўлиши учун ҳар куни бир вақтда, дам олиш кунлари ҳам, ўриндан туриш;
- кун давомида табиий ёруғликни излаш;
- ҳафтасига камида 75 дақиқа жисмоний машқлар бажариш;
- ухлашдан камида 2 соат олдин истеъмол қилиш;
- ухлашдан 30 дақиқа олдин гаджетда ўтирмаслик;
- ноқулай тўшакда ухламаслик.
Изоҳ (0)