Украина армияси Донбассдаги ўз назоратида қолган сўнгги йирик шаҳарлардан бири — Покровскда қуршовда қолиши хавфи мавжуд. Бу ҳақда Пентагон манбаларига таяниб, The Washington Post хабар берди.
Урушдан олдин деярли 400 минг аҳолига эга бўлган ва йилига қарийб 2 миллион тонна кўмир қазиб олган Покровск ҳозир харобага айланган. Россия армияси 2024 йил бошидан бери шаҳарни эгаллашга уринмоқда. Покровск Украина Қуролли Кучларининг Донбассдаги муҳим логистика маркази вазифасини бажарган. Бироқ Россия ҳужумлари шаҳарни боғловчи кўплаб таъминот йўлларини узиб қўйган.
Украина аскарлари шаҳарга кириш учун атиги 15 километр кенгликдаги тор йўлакдан фойдаланмоқда ва бу ҳудуд дрон ҳужумларига қарши ҳимоясиз, дейилади хабарда.
Финляндиянинг Black Bird Group таҳлилчиси Парси Пароинен баҳолашича, ҳафта бошида Покровск яқинида Россия қўшинлари Украина мудофаа чизиғини 17 километр ичкарига ёриб ўтишга эришди. У вазият жуда тез назоратдан чиққанини таъкидлаган.
Россия кучлари Доброполе қишлоғи томон ҳаракатланиб, илғор отрядлар шаҳарни Краматорск билан боғловчи йўлга етиб борди, дейди у.
Украина президенти Владимир Зеленский фронт чизиғи 10 километр ичкарига ёриб ўтилганини тан олган. Бироқ буни кичик ҳарбий гуруҳлар амалга оширганини айтган.
Уларнинг қўлида фақат қурол бор, техника йўқ. Баъзилари аллақачон топилди: айримлари йўқ қилинди, айримлари асирга олинди. Қолганларини ҳам тез орада топиб, йўқ қиламиз, деган Зеленский.
Пароиненнинг фикрича, кейинги 48 соат “ҳал қилувчи бўлади” ва Украина Қуролли Кучлари ёриб ўтишни бартараф эта оладими ёки йўқлиги шу муддатда аниқланади.
Американинг Урушни ўрганиш институти (ISW) ҳисоботида қайд этилишича, Россия қўшинларининг Доброполе ҳудудига кириб бориши сўнгги пайтлардаги бошқа тактик ҳужумларга қараганда анча тез ва чуқур бўлган. Аммо руслар бу ютуқни яқин келажакда оператив даражадаги муваффақиятга айлантира олишларига кафолат йўқ.
Изоҳ (0)