АҚШ президенти Дональд Трамп 15 август куни Аляскада бўлиб ўтадиган Россия президенти Владимир Путин билан учрашув олдидан Москвага огоҳлантириш берди. Унинг айтишича, агар Путин Украинадаги урушни тўхтатишга рози бўлмаса, Россия “жуда оғир оқибатлар”га дучор бўлади. Бу ҳақда Fox News хабар берди.
Маълум қилинишича, Трамп журналистларга берган интервьюсида айнан қандай оқибатлар ҳақида айтаётганини очиқламаган.
“Ҳа, бўлади. Оқибатлари бўлади. Лекин, қандай бўлишини айта олмайман. Лекин охири жуда ёмон бўлади”, деди АҚШ президенти.
Шу билан бирга, Трамп Путин билан бўлган телефон мулоқотларидан сўнг ҳам Украина шаҳарларига ҳужумлар давом этаётганини айтиб, уни тўхтатишга ишончи қолмаганини билдирган.
“Мен у билан гаплашдим. Кейин уйга қайтиб, қарасам, ракеталар қариялар уйи ва кўп қаватли уйга тушган. Кўчаларда одамлар ётибди. Демак, жавоб — йўқ”, деди у.
Трамп урушни тугатишни исташини, буни “Байденнинг уруши” деб билишини, шу билан бирга, уни якунлашдан фахрланишини айтмоқда. У ўз президентлиги даврида яна бошқа 5 та урушни ҳам тугатганини эслатиб ўтди. Бу орада Украина президенти Владимир Зеленский ҳам 13 август куни Россиянинг урушни якунлашга тайёргарлик кўраётгани ҳақида “ҳеч қандай белги йўқ”лигини таъкидлаган.
“Айни пайтда руслар урушни тугатишга тайёргарлик кўраётгани ҳақида ҳеч қандай белги йўқ. Украина, АҚШ, Европа ва тинчлик истайдиган барча давлатларнинг биргаликдаги саъй-ҳаракатлари Россияни тинчликка ундаши мумкин”, деди Зеленский ижтимоий тармоқда.
Изоҳ (0)