Исроил Ғазо секторидаги фаластинликларни Жанубий Суданга кўчириш масаласида мазкур мамлакат билан музокаралар олиб бормоқда. Судан ҳукумати бу таклифни қабул қилишга тайёр эмас. Бу ҳақда Al Jazeera хабар берди.
Маълум қилинишича, Associated Press нашрининг 6 та манбааси ушбу музокараларда иштирок этмоқда. Ҳозирча келишув қандай босқичдалиги номаълум. Агар бу режа амалга ошса, фаластинликлар бир уруш ва очлик хавфи остидаги ҳудуддан бошқа бир инқирозли мамлакатга кўчирилади.
Исроил бош вазири Бенямин Нетаньяху АҚШ президенти Дональд Трамп илгари сураётган “фаластинликларнинг кўчирилиши” режасини амалга ошираётганини билдирмоқда. У бу жараённи “ихтиёрий миграция” деб баҳоламоқда. Айтилишича, яҳудий давлати бошқа Африка давлатлари билан ҳам шундай кўчириш режаларини муҳокама қилган.
“Мен билган уруш қонунларига кўра, аҳолининг кетишига рухсат бериш тўғри иш бўлади. Кейин эса у ерда қолган душманга қарши бор куч билан курашса бўлади”, деди Нетаньяху Жанубий Суданга ишора қилмай.
Айни пайтда, Жанубий Судан ташқи ишлар вазирлиги бу хабарларни қатъиян рад этмоқда. Расмий баёнотда билдирилишича, бу “иддаолар асоссиз бўлиб, ҳукуматнинг расмий позициясини акс эттирмайди”.
Баъзи исроиллик сиёсатчилар фаластинликларни мажбуран Ғазодан чиқариш таклифини илгари сурган, ҳуқуқ ҳимоячилари эса буни халқаро ҳуқуқни бузувчи “этник тозалаш” сифатида баҳоламоқда. Танқидчилар бу режа фаластинликларни Ғазога қайтиш ҳуқуқидан маҳрум қилиб, Исроилга ҳудудни эгаллаш ва яҳудий аҳоли пунктларини тиклаш имконини беришидан хавотирда. Associated Press маълумотларига кўра эса, Жанубий Судан Исроил билан музокаралар эвазига АҚШдан айрим санкцияларни бекор қилиш ва сафар тақиқини олиб ташлашни хоҳламоқда.
Маълумот учун, Жанубий Судан 2011 йилда мустақилликка эришган ва ўша вақтдан бери мамлакатда фуқаролар уруши давом этиб келади. Бу можароларда қарийб 400 минг нафар одам ҳалок бўлиб, мамлакатнинг айрим ҳудудлари очарчиликдан азият чекмоқда. Ҳозир ҳам ички қуролли гуруҳлар ўртасида тўқнашувлар юз бериб туради. Мамлакатдаги жамият фаоллари Судан “одамлар учун чиқиндихонага айланмаслиги” ва “геосиёсий битимларда савдолашиш воситасига айлантирилмаслиги” кераклигини таъкидламоқда.
Изоҳ (0)