Германияда эркак ковидга қарши 217 марта эмланди. Олимлар унинг организмини ўрганди

Коронавирусга қарши 217 марта эмланган 62 ёшли немис эркак илмий тадқиқот мавзусига айланди. Германиялик тадқиқотчилар унинг организмини ўрганиб, натижаларини Lancet Infectious Diseases тиббий журналида чоп этди.

Эркак тўққиз ой ичида 130 та вакцина олгани ҳақида мақола эълон қилингач, тадқиқотчилар у билан боғланиб, изланиш ўтказишни таклиф қилган. У “шахсий сабабларга кўра” 200 мартадан ортиқ эмланганини билдирган. Германия расмийлари унга қарши жиноий иш қўзғатмаган.

Тадқиқот учун эркак қон намуналарини, жумладан, янги, эски қон таҳлили натижалари ва сўнгги йилларда музлатилган қон намуналарини берган. Дастлаб мутахассислар меъёрдан ортиқ эмланиш иммун тизимининг чарчашига олиб келиши мумкинлигини тахмин қилган. Сабаби организмга инфекция кирганида вакциналар тананинг мудофаа қобилиятини тезлаштирувчи, кутиш режимида бўлган иммун ҳужайраларини яратади.

Аммо, аслида, эркакда стандарт уч дозали вакцина олганларга нисбатан Т-ҳужайралари деб номланувчи иммун ҳужайралари кўпроқ чиққан. Бу ҳужайраларда ҳеч қандай чарчоқ аниқланмаган. Мутахассислар бу оддий дозада вакцина олган одамлар каби самарали эканини айтмоқда.

“Умуман олганда, биз заифроқ иммунитет реакциясини аниқламадик”, — дейди тадқиқотнинг етакчи муаллифларидан бири Катарина Кочер.

Ҳатто 217-эмланишда ҳам вакцина таъсири сақланиб қолган: эркакнинг коронавирусга қарши антитаначалари “сезиларли даражада ошган”. Эркак тадқиқот давомида яна бир вакцина олган. Мутахассислар қон намуналарини олиб, у орқали иммун тизими реакциясини аниқлаган.

Тадқиқотчилар ўз изланишларига таяниб, “гипервакцинацияни адаптив иммунитетни ошириш стратегияси сифатида маъқулламасликларини” таъкидлаган. Мутахассислар гарчи эркак ковидга чалингани ҳақида ҳеч қандай аломат топа олмасалар ҳам, улар “гипервакцинация режими” ва инфекциядан қочиш ўртасида боғлиқлик ўрнатишга қодир эмаслигини билдирган.

Германияда 60 миллиондан ортиқ одам коронавирусга қарши эмланган ва уларнинг аксарияти бир неча дозани олган. АҚШ Касалликларни назорат қилиш ва олдини олиш марказлари 65 ёш ва ундан ошганларга коронавирус вакцинасининг иккинчи дозасини олишни тавсия қилди, чунки улар вирусдан оғир касалликка чалиниш хавфи юқори.