Махсус вакцина, хориждаги операциялар ҳам фойда бермаган: россиялик актриса Анастасия Заворотнюк қандай касалликка чалинган эди? 

“Менинг гўзал энагам” сериалида машҳурликка эришган актриса Анастасия Заворотнюк беш йил давомида саратон билан курашди. Унга глиобластома — бош миянинг энг агрессив ўсимтаси ташхиси қўйилган эди. Актриса ўзининг даҳшатли касаллиги ҳақида учинчи бор она бўлганидан бир неча ой ўтиб билиб қолди. Бугунги кунга қадар унинг касаллик йилларида олинган бирорта фотосурати мавжуд эмас.

Бўйиндаги чандиқ ва видео орқали ташхис

2019 йил 23 август куни Анастасия Заворотнюк саратон касаллигига чалингани ҳақида шов-шувли хабарлар тарқалди. Аввалига фойдаланувчилар Instagramъдаги видеога асосланиб шундай хулосага келди. Ереванда заргарлик салонини очиш маросими кўрсатилган видеотасвирда актриса бўйнини беркитишга ҳаракат қилди. Бу эса саратонга биопсия таҳлили олинганига ишора қиларди.

Бир неча кун ичида Анастасиянинг глиобластома билан касаллангани ҳақида маълумотлар пайдо бўлди. 2019 йилнинг 5 апрелида Заворотнюк сўнгги марта — салон очилиш маросимида кўриниш берган эди. Шундан сўнг актрисанинг на касалхонада, на уйда тушган бирор сурати мавжуд эмас. Гўё Настя бирдан ғойиб бўлиб қолгандек эди.

Оила аъзолари доим сукут сақлади, ёрдамчилар рад этишди

Анастасия Заворотнюкка қўйилган мия саратони ташхиси унинг расмий вакиллари томонидан узоқ вақт давомида рад этиб келинди. Актрисанинг менежерлари мазкур хабарларга жавобан:

“Буларнинг бари миш-миш, холос. Сохта хабарларга эътибор бермаслигингизни сўраймиз. Настя ҳозирда фарзандлари билан Италияда таътилни ўтказмоқда. У ўзини яхши ҳис қиляпти. Сентябрь ойида улар қайтиб келади”, — деди Заворотнюкнинг ёрдамчиси Марина Потапова.

Актрисанинг оила аъзолари ва қариндошлари эса ҳеч қандай изоҳ бермади. Бу вақтда Заворотнюкнинг ижтимоий саҳифасида архив фотосуратлар қўйилар эди. Бу эса мухлисларни янада кўпроқ ташвишга солди.

Заворотнюкнинг оиласи даволаниш учун моддий ёрдамдан бош тортди. “Настянинг оиласи муҳтож эмаслиги, уларга ҳеч қандай ёрдам керак эмаслигини айтишди”, — деди Анастасия билан суратга тушган ҳамкасблари. Бу орада касаллик борасидаги миш-мишлар янги даҳшатли тафсилотлар билан кўпайиб борди.

Миядаги шиш ва кома

2019 йил 13 сентябрь куни Анастасия Заворотнюкнинг зудлик билан касалхонага ётқизилгани ҳақида хабарлар пайдо бўлди. Саратон касаллигининг сўнгги босқичи туфайли миясида шиш пайдо бўлган актриса реанимацияга тушиб қолган эди.

Анастасияда ўпка шиши ва пневмония бошлангани учун уни сунъий нафас олиш аппаратига улашди. Актриса эндиликда ўзи ҳаракатлана олмас, кучли дори-дармонлар онгига салбий таъсир кўрсатган эди. Крекшино қишлоғидаги қўшниларининг сўзларига кўра, Настянинг онаси Валентина Борисовна доим кўзида ёш билан юрар эди.

Ўтказиб юборилган саратон

Саратон аниқланишидан аввал Анастасия Заворотнюкда глиобластоманинг асосий белгилари — кучли бош оғриғи, ҳушдан кетиш, қайд қилиш кабилар кузатилган. Актриса бунинг боисини кучли стресс ва кунига 12 соат ишлагани деб тахмин қилган. Саратон тасдиқлангач, унга кимётерапия қилинди, аммо муолажалар бесамар эди. Сўнг даволаниш ишлари хорижда давом этди. Бироқ малакали мутахассислар ҳам унга ёрдам бера олмади. Актриса Москвага қайтиб келишга мажбур бўлди. Маълум вақтдан сўнг шифокорлар унинг қадам ташлашида бузилиш борлигини сезишди. Бу эса ўсимтанинг янада кучайганини англатар эди.

Бош мия суяги трепанацияси

2019 йилнинг баҳорида Германияда актрисада бош мия трепанация операцияси ўтказилди. Бу орқали немис шифокорлари ўсимтанинг бир қисмини олиб ташлашди ва унга қарши дори воситаси ишлаб чиқиш учун лабораторияга намуна юборишди.

Настянинг аҳволи бир оз яхшиланди

2019 йил 18 сентябрь куни Анастасия Заворотнюк ўзини яхши ҳис қилаётгани ҳақида маълумот пайдо бўлди. Эндиликда у мустақил нафас олаётган эди. Шундан сўнг папарацсилар касалхонага киришга уринди. Бундай воқеа қайта такрорланмаслиги учун унинг хонасида кеча-ю кундуз қўриқлаш хизмати ишлай бошлади.

Иккинчи операция

2019 йил 21 сентябрда Анастасия Заворотнюкнинг дўсти Сергей Майоров актрисанинг аҳволи ҳақида айтиб берди: “Кеча мен Настянинг директори Марина Потапова билан боғландим. Иккинчи операция муваффақиятли ўтди. Шифокорлар гистология натижаларини кўриб чиқдилар. Ҳали ҳаммаси яхши бўлишига умид бор”, — деди Майоров Марказий телевидение дастури студиясида.

2019 йил 8 октябрда Анастасия Заворотнюк ўта оғир аҳволдаги беморлар учун ихтисослаштирилган марказга юборилди. Эртаси куни, 9 октябрда эса Заворотнюк танасининг ўнг қисми фалаж бўлиб қолгани ҳақида хабарлар пайдо бўлди.

Оиланинг расмий баёноти

2019 йил 15 октябрда Анастасия Заворотнюкнинг оила аъзолари илк бор унинг касаллиги ҳақида маълумот берди. “Анастасия ҳақиқатан ҳам ҳозирда даволанмоқда. Биз сиздан фақатгина самимий дуо қилишингизни ва беморни ҳурмат қилган ҳолда касаллик тафсилотларини ошкор этмаслигингизни сўраймиз. Бу — бизнинг оилавий ва шахсий ишимиздир”, — деб ёзди актрисанинг яқинлари.

Саратонга даво

2020 йил 5 август куни Анастасия Заворотнюк санкт-петербурглик олимлар томонидан ўзи учун яратилган махсус вакцина билан даволанаётгани маълум бўлди. Бу иммунитет ҳужайраларига асосланган экспериментал вакцина бўлиб, у иммун тизимини саратон ҳужайраларига қарши ҳужум қилиш учун ўргатади. Вакцина ҳар бир бемор учун алоҳида тайёрланади. Даволаш курси икки йилгача давом этиши мумкин.

Анастасия Заворотнюкнинг ўлими

Актрисанинг ўлими ҳақидаги хабар 2024 йил 30 май куни унинг “Вконтакте” саҳифасида пайдо бўлди:

“Бугун тунда, узоқ ва оғир хасталикдан сўнг бизнинг Настя вафот этди”, — деб ёзилган эди хабарда.