АҚШдаги заводда биринчи B61-13 ядровий авиабомбасини йиғиш муддатидан бир йил олдин якунланди. Бу ҳақда АҚШ ядро хавфсизлиги бўйича миллий маъмурияти хабар берди.
Бомбани ишлаб чиқариш 2023 йилда бошланган. У Совуқ уруш давридан бери АҚШ ядровий арсенали тарихидаги энг тезкор лойиҳалардан бири бўлди. Ушбу авиабомба мустаҳкам ерости ҳарбий объектларини — масалан, қўмондонлик бункерлари ва қурол-яроғ омборларини — нишонга олиш учун мўлжалланган. У B-21 Раидер каби стратегик бомбардимончи самолётлар томонидан қўлланилади.
B61-13 бомбаси B61 ядровий гравитацион бомбалар оиласининг энг сўнгги модификацияси бўлиб, 50 йилдан ортиқ вақт давомида АҚШ ядровий триадасининг ҳаво компонентининг асоси бўлиб келмоқда. Бомба B61-12 учун синовдан ўтган ишлаб чиқариш қувватларидан фойдаланади. B61-13 B61-12 билан бир хил хавфсизлик, аниқлик ва бошқарув тизимлари билан жиҳозланган, аммо 360 килотоннагача (Хиросимага ташланган бомбадан 24 баравар кучлироқ) юқори максимал зарба бериш қувватига эга.
B61-13 ишлаб чиқариш тезлиги олимларимизнинг зукколигини ва янги беқарор даврда тийиб туришни кучайтириш вазифасининг долзарблигини кўрсатади, дейди АҚШ энергетика вазири Крис Райт.
Унинг таъкидлашича, бомба душман ва иттифоқчиларга АҚШнинг замонавий чақириқларга тайёрлиги ҳақида сигнал беради. Тўлиқ ҳажмдаги ишлаб чиқариш 2026 йилда бошланиши режалаштирилган. Шунингдек, янги бомбалар умумий ядровий арсенални оширмайди. Чунки ҳар бир B61-13 бир дона B61-12 ўрнини эгаллайди ва шу орқали эскирган, мегатоннали B61-7 ҳамда B83-1 бомбаларини босқичма-босқич фойдаланишдан чиқариб ташлайди.
B61-13 бомбасининг яратилиши баҳс-мунозараларга сабаб бўлди. Америка олимлари федерацияси (FAS) фикрича, бу бомба ҳарбий заруратдан кўра кўпроқ сиёсий мақсад — Конгрессни эски B83-1 бомбасини арсенал таркибидан чиқаришга кўндириш учун ишлаб чиқилган. Чунки B61-12 аллақачон кўплаб нишонларни камроқ зарар билан йўқ қилишга қодир.
B61-13 бомбаси юқори аниқликка эга ва шу туфайли унинг ерости нишонларига зарбасининг сейсмик таъсири ер юзасидаги мегатоннали портлашга тенг бўлади.
Изоҳ (0)