Хиросимада атом бомбаси портлашидан эриб кетган қўл соати ким ошди савдосида 31 минг долларга сотилди

1945 йил 6 августда Япониянинг Хиросима шаҳрига АҚШ томонидан атом бомбаси ташланганда эриб кетган қўл соати Бостондаги RR Auction ким ошди савдосида 31 минг долларга сотилди. Бу ҳақда аукцион сайтида хабар берилди.

Лот ҳақида маълумотда ёзилишича, соат латун (мис ва цинк қоришмасидан тайёрланадиган металл) дан ясалган. Хиросимага эрталаб соат 8:15 да бомба ташланган пайтда соат ишламай қолган. Унинг ўлчами уч сантиметр бўлиб, устки қисми портлаш оқибатида эриб кетган, шишаси синган.

Соатни кимошди савдосига қўйган шахс уни 2015 йилда Ж. П. Гумберт ўтказган аввалги ким ошди савдоси ғолибидан сотиб олган.

Соатни биринчи бўлиб британиялик ҳарбий шаҳарга ижтимоий ёрдам ташиётган пайтда топиб олган ва сақлаб қўйган. Соатнинг асл эгаси номаълум, катта эҳтимол билан у минглаб вафот этган Хиросима шаҳри аҳолисидан бири бўлган.

Шаҳар Мемориал тинчлик музейида юздан ортиқ шундай соатлар сақланади. Улар ядровий қурол даврининг бошланиш рамзига айланиб улгурган.