Олимлар бир неча йил аввал Япониянинг “Ҳаябуса-2” космик кемаси томонидан Ерга олиб келинган Рюгу астероидининг тош намуналарини ўрганишда давом этмоқда. Янги тадқиқот натижалари 900 метр ўлчамдаги космик объектнинг Ер билан эҳтимолий тўқнашуви натижасини башорат қилиш имконини берди. Бу ҳақда Space хабар берди.
Япония аэрокосмик тадқиқотлар агентлиги (JАХА) ходими Сатоши Танаканинг сўзларига кўра, ҳозирда Рюгу астероиди сайёрамизга ҳеч қандай хавф туғдирмайди. Аммо бундай тадқиқотлар Ер билан тўқнашган астероидларнинг оқибатларини баҳолаш ва сайёрани ҳимоя қилиш режаларини тайёрлаш учун муҳимдир.
2018 йилда Япониянинг “Ҳаябуса-2” космик кемаси 42 ойлик саёҳатдан сўнг кенглиги тахминан 900 метр бўлган Рюгу астероидига етиб борган. Бунинг учун қурилма 300 миллион км масофани босиб ўтиши керак эди.
Олимлар Рюгу астероиди тортишиш кучи билан боғланган тошлар уюмидир, деган хулосага келди, аммо бу тошлар жуда мўрт ҳисобланади.
Бу шуни англатадики, агар астероид Ер томон яқинлашса, унинг парвоз йўлини ўзгартириш учун жуда эҳтиёт бўлиш керак. Ҳозирча олимлар Рюгу астероидини Ер учун жуда хавфли деб ҳисобламайди, чунки у сайёрамизга 100 минг км дан ортиқроққа яқинлашмайди. Аммо унинг катталиги ва Ердан узоқлиги ҳисобга олинса, космик объект ҳанузгача потенсиал хавфли деб таснифланади.
Танаканинг сўзларига кўра, агар Рюгу Ер билан тўқнашса ва сайёра атмосферасига 45 градуслик бурчак остида 17 км/с тезликда кирса, у ҳолда сайёра юзасидан 35-40 км баландликда парчаланиб кетади.
“Астероиднинг парчаланиши улкан портлашга олиб келади, бу 2013 йилда Россиянинг Челябинск шаҳри устида 30 км баландликдаги астероид портлашига ўхшаш бўлади”, — дейди Танака.
У астероид деярли 50 баравар кичикроқ (эни 20 метр) бўлган, бироқ портлаши 400-500 килотон тротилга тенг эди.
Яъни, портлаш пайтида 1945 йилда Япониянинг Хиросима шаҳрига ташланган атом бомбаси портлашидан 33 баробар кўп энергия ажралиб чиққан. Челябинскка астероид бўлаклари қулаши оқибатида 1500 га яқин одам жабрланган.
Танаканинг фикрича, Ерга тушадиган астероид парчалари ҳажми анча катта бўлади, гарчи улар қандай бўлишини ҳозирча айтиш қийин.
Изоҳ (0)