AQSHdagi zavodda birinchi B61-13 yadroviy aviabombasini yig‘ish muddatidan bir yil oldin yakunlandi. Bu haqda AQSH yadro xavfsizligi bo‘yicha milliy ma’muriyati xabar berdi.
Bombani ishlab chiqarish 2023-yilda boshlangan. U Sovuq urush davridan beri AQSH yadroviy arsenali tarixidagi eng tezkor loyihalardan biri bo‘ldi. Ushbu aviabomba mustahkam yerosti harbiy obyektlarini — masalan, qo‘mondonlik bunkerlari va qurol-yarog‘ omborlarini — nishonga olish uchun mo‘ljallangan. U B-21 Raider kabi strategik bombardimonchi samolyotlar tomonidan qo‘llaniladi.
B61-13 bombasi B61 yadroviy gravitatsion bombalar oilasining eng so‘nggi modifikatsiyasi bo‘lib, 50 yildan ortiq vaqt davomida AQSH yadroviy triadasining havo komponentining asosi bo‘lib kelmoqda. Bomba B61-12 uchun sinovdan o‘tgan ishlab chiqarish quvvatlaridan foydalanadi. B61-13 B61-12 bilan bir xil xavfsizlik, aniqlik va boshqaruv tizimlari bilan jihozlangan, ammo 360 kilotonnagacha (Xirosimaga tashlangan bombadan 24 baravar kuchliroq) yuqori maksimal zarba berish quvvatiga ega.
B61-13 ishlab chiqarish tezligi olimlarimizning zukkoligini va yangi beqaror davrda tiyib turishni kuchaytirish vazifasining dolzarbligini ko‘rsatadi, deydi AQSH energetika vaziri Kris Rayt.
Uning ta’kidlashicha, bomba dushman va ittifoqchilarga AQSHning zamonaviy chaqiriqlarga tayyorligi haqida signal beradi. To‘liq hajmdagi ishlab chiqarish 2026-yilda boshlanishi rejalashtirilgan. Shuningdek, yangi bombalar umumiy yadroviy arsenalni oshirmaydi. Chunki har bir B61-13 bir dona B61-12 o‘rnini egallaydi va shu orqali eskirgan, megatonnali B61-7 hamda B83-1 bombalarini bosqichma-bosqich foydalanishdan chiqarib tashlaydi.
B61-13 bombasining yaratilishi bahs-munozaralarga sabab bo‘ldi. Amerika olimlari federatsiyasi (FAS) fikricha, bu bomba harbiy zaruratdan ko‘ra ko‘proq siyosiy maqsad — Kongressni eski B83-1 bombasini arsenal tarkibidan chiqarishga ko‘ndirish uchun ishlab chiqilgan. Chunki B61-12 allaqachon ko‘plab nishonlarni kamroq zarar bilan yo‘q qilishga qodir.
B61-13 bombasi yuqori aniqlikka ega va shu tufayli uning yerosti nishonlariga zarbasining seysmik ta’siri yer yuzasidagi megatonnali portlashga teng bo‘ladi.
Izoh (0)