Қўшма Штатлар Тинч океанидаги Тиниан оролида Японияни атом бомбаси билан бомбардимон қилиш учун фойдаланилган авиабазани қайта қурмоқда. Бу ҳақда Германиянинг Bild нашри хабар берди.
Қайд этилишича, авиабаза ташландиқ ҳолатда бўлган, бироқ 2024 йилнинг январь ойидан бошлаб АҚШ ҳарбийлари уни тозалаш ва учиш-қўниш йўлакларини жиҳозлашни бошлаган. 20 миллион квадрат метрдан ортиқ асфалт қайта тикланган, юзлаб гектар ўрмонлар тозаланган.
“Пентагон ушбу лойиҳа учун деярли ярим миллиард доллар ажратди. Ҳаво базаси Тинч океанини тўхтатувчи ташаббус режасига мувофиқ модернизация қилинмоқда”, дейилади хабарда.
Немис журналистлари Тиниан ороли Иккинчи жаҳон урушида Қўшма Штатлар учун муҳим рол ўйнаганини қайд этган, Хиросима ва Нагасакига атом бомбаларини ташлаган америкалик бомбардимончилар айнан шу ердан ҳавога кўтарилган. Шу билан бирга, базадан АҚШ-Хитой қарама-қаршилигининг бир қисми сифатида ҳам фойдаланиш мумкин.
Аввалроқ АҚШ ҳарбий-денгиз кучлари штаби бошлиғи Лиза Франчетти 2027 йилда Хитой билан юзага келиши мумкин бўлган можарога флотнинг тайёргарлигини ошириш режасини тақдим этган. У флотга техник хизмат кўрсатишда қолиб кетишни бартараф этиш, робототехникани кучайтириш, янги қўмондонлик марказларини яратиш, асосий инфратузилмани қайта қуриш ва ҳарбийларни ўқитиш орқали кучларни тайёрлаш каби мақсадларни ўз ичига олади.
НАТО, шунингдек, Хитойга қарши туриш учун Тинч океанининг ғарбий қисмидаги иштирокини кучайтирмоқда. Хитой ўз қирғоқлари яқинида НАТО беқарорлик келтириб чиқараётганини айтган. Июль ойида Хитой ТИВ вакили альянс “Европада тартибсизликларни келтириб чиқарганидан кейин Осиё-Тинч океани минтақасида бетартиблик яратмаслиги керак”лигини таъкидлаган.
Изоҳ (0)