Ўзбекистонда қуриладиган атом электр станциясида портлаш бўлиши мумкин эмас. Бу ҳақда Москва муҳандислик-физика институти Тошкент филиали ўқитувчиси Қосим Тўхтаохунов “Дарё”га берган интервьюсида айтиб ўтди.
Жорий йил августда Жиззах вилоятида кам қувватли атом электр станцияси қурилиши бошланади. Станция Россиянинг “Росатом” тузилмасидаги “Атомстроекспорт” АЖ томонидан қурилади. Аксарият ижтимоий тармоқлар фаоллари АЭС хатарли эканини айтиб, унинг портлашидан хавотир билдирмоқда. Қосим Тўхтаохуновнинг таъкидлашича, бундай хавотирлар ўринсиз.
“АЭС ва атом бомбасида бўлаётган жараёнлар мутлақо бошқа-бошқа. АЭС реакторида ҳеч қачон портлаш бўлиши мумкин эмас. Чернобилда бошқа реактор тури эди — RBMK. У ерда хавф бўлган. Фукусимада ҳам “кипяший” реактор. Дунё мазкур турдаги реакторлардан воз кечган. Ҳозир ундай реакторлар қурилмаяпти. Ҳозир бутун дунёда фақатгина VVER конструкциялари қурилмоқда. Бунда хавфсизлик томонига кўпроқ эътибор берилади. Тўғри, темир ускуна бўлгандан кейин авария бўлиши мумкин. Лекин бунинг даражаси жуда паст. Атроф-муҳитга салбий таъсири кам. Чунки авариянинг олдини оладиган тизим бор”, —деди мутахассис.
“Ўзатом” агентлиги ҳузуридаги АЭС қурилиши дирексияси директори Отабек Омоновнинг қўшимча қилишича, станция қурилишида хавфсизлик талаблари юқори.
“Қурилишда монолит темир бетон ишлатилиши жуда кўп. Кучли шамол, ер қимирлаши ва бошқа хавфларга чидамлилиги тўлиқ ўрганилади. АЭС қурилиш харажатларининг кўп қисми хавфсизлик таъминланиши учун сарфланади”, — деди дирексия раҳбари.
Аввалроқ Ўзбекистонда АЭС қурилиши бўйича Халқаро атом энергияси агентлиги (МАGATE) билан ҳамкорлик қилинаётгани айтилганди. Қурилиш жараёнига тахминан 5 минг киши жалб қилиниши кутилмоқда. Улар орасида ўзбекистонлик ва россиялик қурувчилар бўлади.
Изоҳ (0)