Япониянинг Нагасаки шаҳрида 1945 йилда содир этилган атом бомбаси портлаши қурбонларини хотирлаш маросимига Исроил таклиф қилинмади. Бу ҳақда CNN нашри хабар берди.
Манбада айтилишича, Япония ҳукумати хотирлаш маросимини 9 август кунига белгилаган. Маросимда портлаш оқибатида ҳалок бўлганларни ёдга олиш, уларнинг руҳига ҳурмат кўрсатиш ва инсониятни ядровий таҳдиднинг ҳалокатли оқибатларидан огоҳлантириш мақсад қилинган.
Япония расмийларининг Исроилни маросимлардан четлаштириш қарори Ғазо операцияси билан боғлиқ экани айтиб ўтилган. Расмийлар тинчликка таҳдид солаётган мамлакат тинчлик ва ҳамкорликни тарғиб қилиш учун ташкил этилган тадбирларда иштирок этиши мумкин эмас, деган хулосага келган.
Япония расмийлари Исроил ҳақида алоҳида баёнот бериб, мамлакатнинг Фаластиндаги хатти-ҳаракатларини қоралаган. Агрессия давом этадиган бўлса, Исроилнинг халқаро майдондаги иштироки чекланиши ҳам давом эттирилиши билдирилган.
Нагасаки мэри Широ Сузуки журналистларга берган интервьюсида Исроилнинг маросимдан четлатилгани кўпроқ хавфсизлик нуқтайи назаридан амалга оширилганини билдирган. Унга кучли сиёсий тус бермаслик сўралган.
“Бу қарор сиёсий мулоҳазаларга эмас, балки атом портлаши қурбонларини хотирлаш маросимини тинч ва тантанали руҳда ўтказиш ҳамда маросимнинг силлиқ ўтишини таъминлаш истагимиздан келиб чиққанини алоҳида таъкидламоқчиман”, деган Нагасаки мэри.
Маълумот ўрнида, 1945 йилнинг 9 август куни АҚШ авиацияси томонидан Япониянинг Нагасаки шаҳрига атом бомбаси ташланиши кунчиқар империянинг тўла таслим бўлишига олиб келди. Ядровий қурол ишлатилиши оқибатида ўшанда шаҳарнинг 100 мингга яқин аҳолиси ҳалок бўлган. Радиоактив нурларнинг ҳудудда тарқалиши 70 йилдан кўпроқ вақтдан бери давом этмоқда.
Ҳар йили атом бомбаси портлатилган Хиросима ва Нагасаки шаҳарларида тинчлик ва ҳамкорликка бағишланган маросимлар ўтказиб келинади. Уларда жами 115 мамлакат, хусусан, Европа Иттифоқи етакчилари ҳам иштирок этади.
Изоҳ (0)