Япония урушда яраланган украиналик аскарларни даволаш учун қабул қилади, Украинага 100 та ҳарбий юк машинаси ва бошқа транспорт воситалари, шунингдек, армия учун 30 минг тўплам озиқ-овқатни топширади. Бу ҳақда “ТАСС” Япония ташқи ишлар вазирлигига таяниб хабар берди.
Япония ТИВ маълум қилишича, бош вазир Фумио Кисида Хиросимада бўлиб ўтган музокаралар чоғида Украина президенти Владимир Зеленскийга тегишли ваъдани берган. Бош вазир, шунингдек, Украинага ҳар томонлама, жумладан, мамлакат инфратузилмасини тиклашга қаратилган ёрдамни давом эттиришини айтган.
Япония 19–21 май кунлари Хиросима шаҳрида “Еттилик гуруҳи” давлатларининг (G7) саммитига мезбонлик қилди. Дастлаб, Зеленский унда видеоалоқа орқали иштирок этиши тахмин қилинган эди. Бироқ кейинчалик у учрашувда шахсан иштирок этиш истагини билдирди. Президент 20 май куни Хиросима аэропортига Франция ҳукуматининг самолёти билан етиб келди.
Катта еттилик саммити якунлари бўйича ўтказилган матбуот анжуманида нутқ сўзлаган Зеленский Япониядаги атом бомбаси ташланганидан сўнг вайрон бўлган Хиросима шаҳри суратлари Бахмутдаги ҳозирги манзарага ўхшаш эканини айтди. Шу билан бирга, у ҳозир Хиросима замонавий, тинч, ривожланаётган шаҳар эканини таъкидлади. Келажакда Бахмутни ҳам худди шундай ўзгаришлар кутаётганига умид билдирди.
Бунга Россия Ташқи ишлар вазирлигининг расмий вакили Мария Захарова “иккаласига ҳам Оқ уй жавобгар” дея муносабат билдирди.
Изоҳ (0)