Ота-она қарамоғисиз қолган яна бир вояга етмаган қизча Россиядан Ўзбекистонга қайтарилди. Бу ҳақда болалар омбудсмани хабар берди.
Маълум қилинишича, болалар омбудсманига Сурхондарё вилояти Сариосиё туманида истиқомат қилувчи фуқаро Н.Г. (аёл)нинг мурожаати келиб тушган.
Мурожаатда вояга етмаган невараси Д.Р. (2023 йилда туғилган)нинг отаси вақтинча ҳибсхонада, онаси эса миграция марказида сақланаётгани сабабли 2 ёшли фарзанди Россияда ота-она қарамоғисиз қолгани, ҳозирда Нижний Новгород шаҳар болалар шифохонасида эканлигини билдириб, неварасини Ўзбекистонга қайтарилишида амалий кўмак сўраган.
Болани Ўзбекистонга қайтариш чоралари кўрилиб, ҳужжатлар расмийлаштирилди. Шунингдек, боланинг онаси ҳам Ўзбекистонга фарзанди билан қайтиши учун чоралар кўрилди.
Натижада 16 май куни қизча онаси ҳамроҳлигида Ўзбекистонга олиб келинди ва бувиси билан яшаш манзилига етказилди.
Хориждан Ўзбекистонга қайтарилган болалар
2024 йил август—сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди. Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
Изоҳ (0)