Россия армияси апрель ойи бошидан бери Украинага қарши 2800 га яқин авиация бомбаси, 1400 дан ортиқ зарба берувчи учувчисиз учиш аппарати ва 60 га яқин турли хилдаги ракеталар, шу жумладан баллистик ракеталарни қўллаган. Бу ҳақда Украина президенти Владимир Зеленский Меtа ижтимоий тармоғида маълум қилди.
“Россия террори ҳар куни ва ҳар кеча давом этмоқда. Фақатгина апрель ойининг бошидан бери Россия армияси аллақачон 2800 га яқин авиация бомбаси, 1400 дан ортиқ зарба берувчи учувчисиз учиш аппаратини қўллаган ва уларнинг аксарияти Shahed, шунингдек, турли хилдаги 60 га яқин ракета, шу жумладан баллистик ракеталарни ишлатган”, дея таъкидлади Зеленский.
Украина президентининг айтишича, ҳозирда Сумида кечаги Россиянинг баллистик ракеталар билан қилган ҳужумидан сўнг 38 киши, жумладан тўққиз нафар бола тиббиёт муассасаларида даволанмоқда.
“11 киши, улардан 3 нафари болалар, оғир аҳволда. Уларга иложи борича кўпроқ ёрдам кўрсатиш учун барча чоралар кўрилмоқда. Фақат кечаги ҳужумнинг ўзида 34 киши ҳалок бўлди, 119 киши яраланди. Афсуски, икки нафар бола вафот этди, 15 нафари жароҳатланди”, дейди Украина президенти.
Бундан ташқари, Одессада тунги “шаҳид” ҳужуми пайтида етти киши жароҳат олган. Шунингдек, россияликлар шу кеча Славянск, Уман, Харьков, Берислав ва бошқа шаҳар ҳамда қишлоқларни ўққа тутган.
“Фақатгина Россияга ҳақиқий босим ўтказиш орқали буни тўхтатиш мумкин. Россиянинг қотиллик машинасини молиялаштирувчи секторларга нисбатан таъсирчан санкция чоралари кўрилиши зарур. Уруш олиб келган томон тўхташи ва қилмишлари учун жавоб бериши керак - бу адолатли йўл”, дея якунлаган президент.
Украина президенти Владимир Зеленский америкалик ҳамкасби Дональд Трампни “тинчлик режаси”ни амалга оширишдан олдин Украинага келишга чақирганди.
Изоҳ (0)