Суратга олинганига 25 йил бўлишига қарамасдан, “Сардор” сериали ҳозиргача ватанпарварлик руҳидаги сериаллар ичида миллионлаб инсонларнинг севимли фильми бўлиб қолмоқда. Сериал 2000 йилда режиссёр Шавкат Маҳбубов томонидан суратга олинган бўлиб, унда бош ролларни Улуғбек Юнусов, Шомаҳмуд Шорасулов, Бобур Йўлдошев, Жамшид Арслонов, Нигора Каримбоева, Ўткир Менглиев, Дурдона Турсунбоева, Ёқуб Аҳмедов, Карим Мирҳодиев, Маҳмуд Исмоилов, Фотиҳ Жалолов сингари актёр ва актрисалар ижро этишган
“Генералнинг жияни” курсант Зафар Давлатназаров ролини маҳорат билан ижро этган Бобур Йўлдошев сериални суратга олиш жараёнида 21 ёшда бўлган.

“Сардор” сериалидан сўнг бирин-кетин “Дев билан пакана”, “Осмондаги болалар 2”, “Севинч”, “Ватан”, “Забаржад”, “Омад”, “Қўрғошин”, “Тоға” каби фильмларда бош ролларни ижро этган.

Актёр бугунги кунда “Дийдор” ёшлар театри раҳбари сифатида фаолиятини давом эттирмоқда.
“Сардор” сериалида сержант Замира ролини ижро этган актриса Нигора Каримбоева ўша вақтда 21 ёшда бўлган. Ушбу сериалдаги ижро актрисанинг илк ролларидан бири ҳисобланади.

Актриса ҳозирги кунга қадар “Алвидо”, “Ватан”, “Чашма”, “Осмон яқин”, “Дада”, “Сабот”, “Тоға” каби фильмларда турли даражадаги ролларни ижро этган.
Нигора Каримбоева бугунги кунда “Илҳом” театрида актриса, шунингдек, телеканалда бошловчи сифатида фаолиятини давом эттирмоқда.
Актёр Улуғбек Юнусов “Сардор” сериалида курсант Ўктам ролини ижро этган. “Сардор” сериали актёрнинг илк ролларидан бири ҳисобланади.

“Сардор” сериалидан ташқари “Қайтар дунё” сериалидаги Абдулла роли билан ҳам актёр мухлислар орасида машҳурликка эришган.

Асли касби режиссёр бўлган, фильмларда рол ижро этишни хушламайдиган Улуғбек Юнусов “Муҳаббат синовлари”, “Сарвиноз”, “Фотима ва Зуҳра”, “Жасур”, “Бегоналар”, “Муқаддас бурч” каби фильмларда турли даражадаги ролларни ижро этган.
Актёр ва режиссёр Улуғбек Юнусов бугунги кунда тадбиркорлик билан шуғулланмоқда.
“Сардор” сериалида курсант Исмоил Қудратов ролини ижро этган Шомаҳмуд Шорасулов 31 ёшда бўлган.

Ҳозирги кунда дубляж режиссёри бўлиб ишлаётган Шомаҳмуд Шорасулов интервьюларида “Сардор”даги ролининг катта қисми кесиб ташланганини ва шундан сўнг фильмларда рол ижро этмаганини маълум қилган эди.

Шомаҳмуд Шорасулов моддий қийинчиликлар сабаб Исроил давлатида 10 ой давомида официантлик қилган.
Шомаҳмуд Шорасулов “Сарой жавоҳири”, “Ёз ифори” (Корея), “Икки тақдир” (Ҳиндистон), “Оила ришталари” (Туркия), “Телба”, “Жиноят ва жазо”, “Ўсмир” (Достоевский асарлари асосида. Россия) “Уруш ва тинчлик” (BBC) каби сериалларга, “Ваня тоға”, “Жамила” (Россия) “Илтижо”, “Тазарру”, “Орзу дарахти” (Грузия) “Самовий ёғду”, “Ёмғир”, “Тилла балиқча”, “Чумчуқ қўшиғи” (Эрон) “Ёввойи нок” (Туркия) “Қўрқоқ”, “Апу трилогияси”, “Қизил қалампир” (Ҳиндистон), “Йўл”, “Қизил саҳро” (Италия), “Расёмон”, “Қумликдаги аёл” (Япония) каби бадиий фильмларни овозлаштириш жараёнига режиссёрлик қилган.
Ўзбекистонда хизмат кўрсатган артист Ҳошим Арслоновнинг тўнғич фарзанди Жамшид Арслоновни кино ихлосмандлари аввало Ҳошим Арслоновнинг ўғли эмас, балки “Сардор” сериалидаги жанжалкаш курсант Ботир Розиқов роли билан танишади.

Жамшид Арслонов “Сардор” сериалида 22 ёшида суратга тушган. “Занжир”, “Чемпионлик орзуси” сериаллари ҳамда “Отамдан қолган далалар” фильмида турли даражадаги ролларни ижро этган.

Жамшид Арслонов бугунги кунда тадбиркорлик билан шуғулланади.
Фаолиятини 1998 йилда “Шайтанат” сериалида эпизод ролдан бошлаган актриса Дурдона Турсунбоева 2000 йилда “Сардор” сериалида сержант ролини ижро этган.

Актриса бугунги кунда АҚШда яшаб, тадбиркорлик билан шуғулланади.
Актёр Ўткир Менглиев “Сардор” сериалида “старшина” Эшжонов ролини ижро этган. Актёр ўшанда 23 ёшда бўлган.

Ўткир Менглиев “Сардор”даги илк ролидан сўнг “Кичкина одамлар”, “Тавба”, “Адвокатлар”, “Дада”, “Зирапча”, “Акажон, хизматингиздамиз”, “Тақдирлар” каби бир қанча фильмларда турли даражадаги ролларни ижро этган.
Ўткир Менглиев бугунги кунда Ўзбек миллий академик драма театри актёри сифатида фаолиятини давом эттирмоқда.
Ўзбекистонда хизмат кўрсатган артист Ноила Тошкенбоева сериалда Дилором опа образини гавдалантирган. Ўшанда у 56 ёшда эди. У бугунги кунда ҳам фаол ижод билан машғул, актриса фильм ва сериалларда роллар ижро этиш билан биргаликда, дубляжда ҳам самарали фаолият юритмоқда.
-4xe58xDo.avif)
Ноила Тошкенбоева фаолияти давомида “Шум бола”, “Суюнчи”, “Тўйлар муборак”, “Келинлар қўзғолони” каби бир қанча фильмларда роллар ижро этган. Актриса дубляждаги фаолияти мобайнида мингдан ортиқ бадиий фильмлар, мультфильмлар ва сериалларга овоз берган. Айниқса, овоз берган фильмларидан “Эсмералда”, “Аёл”, “Парчаланган юраклар”, “Золим Истанбул” сингари сериаллардаги дубляж ишлари алоҳида аҳамиятга эга.
Ўзбекистонда хизмат кўрсатган артист Жалол Юсупов “Сардор”да суратга тушганида 30 ёшда эди.

Жалол Юсупов “Сардор”дан сўнг “Бир кам дунё”, “Занжир” сериалларида, “Дард”, “Аросат”, “Алданган аёл”, “Матонат” каби фильмларда турли образларни гавдалантирган.
Учқун Тиллаев сериалда взвод командири образини гавдалантирган. Ўшанда у 26 ёшда эди.
-PfTjFZJN.avif)
Учқун Тиллаев бугунги кунда Ички ишлар вазирлигининг ансамблида фаолият юритади. Подполковник Учқун Тиллаев 2014 йилдан буён ансамблнинг маданият саройи раҳбари ҳисобланади.
Актёр суратга тушган фильмлар орасида “Остона”, “Жазо”, “Эгизаклар”, “Пойқадам” ҳамда “Пойга” фильмлари машҳур.
Режиссёр ва ссенарист Ҳилол Насимов сериалда суратга тушган пайтда 37 ёшда эди.

Ҳилол Насимов “Алданган аёл”, “Меросхўр”, “Тубанлик” каби фильмлари билан томошабинларга яхши таниш. Режиссёр бугунги кунда ижоддан ташқари, ёш кадрларга дарс бериб келмоқда.
Ўзбекистонда хизмат кўрсатган артист Карим Мирҳодиев сериалда суратга тушганида 35 ёшда эди.

Карим Мирҳодиевнинг ижодида бугунги кунда танаффус кузатилмоқда. Томошабинлар унинг “Чархпалак”, “Кичкина табиб”, “Осмон яқин”, “Қўрғошин”, “Кечиккан ҳаёт”, “Ҳамроҳ” каби фильмларидаги образлари билан яхши танишади.
Гулчеҳра Носирова сериалда суратга тушганида 36 ёшда эди.
-Cy1kzcrm.avif)
Актриса бугунги кунда “Муқимий” номидаги мусиқали драма театрида фаолият юритмоқда. Актриса “Супер келинчак”, “Хавфли бурилиш”, “Опа-сингиллар”, “Сеҳрли қалпоқча”, “Аёл қасоси” каби фильм ва сериалларда ҳам роллар ижро этган.
Ўзбекистонда хизмат кўрсатган артист Маҳмуд Исмоилов сериалда суратга тушганида 35 ёшда эди.

Маҳмуд Исмоилов бугун ҳам фаол ижод билан банд. Унинг “Севги фазоси”, “Қайтар дунё”, “Шайтанат”, “Опа-сингиллар”, “Бевалар” ва “Муқаддас бурч” каби лойиҳалардаги образлари томошабинлар қалбидан муносиб жой эгаллаган.
Сериалда генерел образини маҳорат билан ижро этган Ўзбекистон халқ артисти Ёқуб Аҳмедов ҳозирда табаррук 87 ёшда. У айни пайтда фарзандлари ва неваралари даврасида умргузаронлик қилмоқда.
-bVUvOwG_.avif)
Ёқуб Аҳмедов Отелло, Юсуфбек ҳожи, Креонат, Шоҳжаҳон, Каренин сингари роллари билан ўзбек театри тарихида муносиб из қолдирган, саҳнада Абу Райҳон Беруний, Али Қушчи, Алишер Навоий, Заҳириддин Муҳаммад Бобур, Зокиржон Холмуҳаммад ўғли Фурқат, Абай каби тарихий сиймоларни гавдалантириб, шон-шуҳрат қозонган ўзбек киносининг тирик афсонаси. Унинг фильмографиясидан 100 га яқин муваффақиятли лойиҳалар ўрин олган.
Изоҳ (0)