Ота-она қарамоғисиз қолган вояга етмаган бола Россиядан Ўзбекистонга қайтарилди, деб хабар бермоқда Ижтимоий ҳимоя миллий агентлиги.
Келтирилишича, самолёт бортида Россия Ички ишлар вазирлиги ходимлари ҳамроҳлигида, ота-она қарамоғисиз қолган, вояга етмаган Ўзбекистон фуқароси олиб келинди.
Вояга етмаган бола Тошкент шаҳар Ички ишлар бош бошқармаси ҳузуридаги Вояга етмаганларга ижтимоий-ҳуқуқий ёрдам кўрсатиш марказига вақтинча жойлаштирилди.
Болани “Инсон” ижтимоий хизматлар маркази кўмагида олдиндан тайёрланган ота тарафдаги оиласи кутиб олди. Вояга етмаган фуқаро учун ижтимоий қўллаб-қувватлаш ишлари унинг доимий яшаш жойида давом эттирилади.
Ўзбекистон Ички ишлар вазирлиги, Ташқи ишлар вазирлиги ва президент ҳузуридаги Ижтимоий ҳимоя миллий агентлигининг самарали ҳамкорлиги натижасида 2025 йил 13 май ҳолатига қадар жами 54 нафар вояга етмаган фуқаро ватанга қайтарилди.
Хориждан Ўзбекистонга қайтарилган болалар
2024 йил август—сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди. Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
Изоҳ (0)