БМТ Инсон ҳуқуқлари бўйича Олий комиссари бошқармаси ўзининг Twitter’даги саҳифаси орқали Украинанинг қанча тинч аҳолиси ҳалок бўлганини маълум қилди.
Маълумотларга кўра, Украинада 24 февраль куни бошланган ҳарбий ҳаракатлар давомида камида 227 нафар фуқаро ҳалок бўлган ва 525 киши жароҳат олган.
«24 февраль куни соат тонгги 04:00 да Россия Украинага қарши ҳарбий ҳаракатларни бошлаганидан 1 март ярим тунгача БМТ Инсон ҳуқуқлари бўйича Олий комиссари бошқармаси Украинада 752 нафар тинч аҳоли ҳалок бўлгани ёки яраланганини қайд этди: уларнинг 227 нафари ҳалок бўлган (31 нафар эркак, 25 нафар аёл, 6 нафар ўгил бола ва 3 нафар қизча, шунингдек, 6 нафар бола ва 156 нафар катта ёшдаги инсонларнинг жинсини ҳозирча аниқлашнинг имкони бўлмаган) ва 525 нафари жароҳат олган (42 нафар эркак, 33 нафар аёл, 7 нафар қиз ва 2 нафар бола, шунингдек, 19 нафар бола ва 422 нафар катта ёшдаги инсонларнинг жинсини ҳозирча аниқлашнинг имкони бўлмаган)», — дейилади ҳужжатда.
Маълум қилинишича, ушбу тинч аҳолининг ўлими ёки жароҳаланишига кенг таъсир доирасига эга портловчи қурилмалар, жумладан, оғир артиллерия, реактив ўт очиш тизимлари ва авиаҳужумлар сабаб бўлган.
Бошқарма ҳақиқий рақамлар бундан сезиларли даражада юқори ва қўшимча тасдиқланишлар лозим деб ҳисоблайди. Чунки жанговар ҳаракатлар давом этаётган айрим ҳудудлардан маълумотларнинг келиши кечикмоқда.
24 февраль куни Россия президенти Владимир Путин Донбасс аҳолисини ҳимоя қилиш, Украинани «демилитаризация» ва «денасификация қилиш» учун «махсус ҳарбий операция» бошланганини эълон қилди. Кремль гап «ҳарбий салоҳиятни зарарсизлантириш» ва «Украинани нацистлардан тозалаш» ҳақида кетаётганини тушунтирди. Путиннинг баёнотидан кейин Украина шаҳарлари бир неча бор ўққа тутилди. 1 март куни эрталаб Харьковдаги вилоят маъмурияти биноси жойлашган Озодлик майдонига ракета ҳужумига учраган. Портлаш оқибатида етти киши ҳалок бўлди, 20 дан ортиқ одам жароҳатланди. Украина президенти Владимир Зеленский ракета зарбасини «очиқдан очиқ террор» деб атади.
2 март куни Россия Мудофаа вазирлиги Украинадаги ҳарбий операциялардаги йўқотишлар ҳақида маълумот бериб, урушда Россия томонидан 500 га яқин аскар ҳалок бўлгани маълум қилди. Шунингде, Рамзан Қодировнинг сўзларига кўра, Украинадаги урушда икки нафар чеченистонлик аскар ҳалок бўлган, яна олти нафари турли оғирликдаги жароҳатлар олган.