Украина президенти Владимир Зеленский Россиянинг Днепрдаги кўп қаватли уйга ракета билан зарбалари фонида 15 январь куни кечки мурожаатида россияликларга рус тилида мурожаат қилди, деб ёзади DW.
«Ҳамма нарсани яхшилаб кўриб, билиб туриб, бу террорни қоралаб лом-мим демаган россияликларга қарата гапирмоқчиман. Сизнинг қўрқоқларча жимжитлик сақлашингиз, бўлаётган воқеаларнинг ўтишини пойлаб туришга уринишингиз оқибатида бу террорчилар бир кун келиб сизнинг ҳам изингиздан тушади. Ёвузлик қўрқоқликни жуда яхши сезади ва ўзидан қўрқиб, савдолашишга уринаётганларни доим эслаб қолади. У сизнинг ортингиздан келганида эса, сизни ҳимоя қиладиган ҳеч ким бўлмайди», — деди Украина раҳбари.
Днепрдаги уйга зарба берилиши оқибатида 30 киши ҳалок бўлди, деди Украина президенти. Улардан бири 15 ёшли қизча бўлган. Икки нафар бола эса ота-онасиз қолган.
Зеленскийнинг айтишича, ракета келиб тушганида уйда бўлган деб тахмин қилинаётган 30 кишининг тақдири номаълум бўлиб турибди. «Ўнлаб одамларни вайроналар остидан чиқариб олишга муваффақ бўлдик, уларнинг олти нафари болалар. Биз ҳар бир киши учун курашяпмиз! Кимнингдир ҳаётини сақлаб қолиш учун энг кичик имконият мавжуд бўлиб турар экан, қутқарув операцияси давом этаверади», — дея таъкидлади у.
Россиянинг Украинага 14 январь кунги оммавий ҳужуми вақтида Днепр шаҳридаги тўққиз қаватли турар жой биносига ракета келиб тушди. Ракета ҳужуми оқибатида 72 хонадон вайрон бўлган, 230 дан ортиғи зарар кўрган.
14 январь куни тушдан кейин Россия Украинага қарши навбатдаги оммавий зарбаларни берди. Днепрда тўққиз қаватли бинога ракета урилиши оқибатда иккинчи қаватдан тўққизинчи қаватгача бўлган иккита подъезд вайрон бўлган.
Изоҳ (0)