Эрон расмийлари 4 май куни “Қассем Басир” номли янги қаттиқ ёнилғили баллистик ракетаси муваффақиятли синовдан ўтказилганини эълон қилди. Бу ҳақда Tehran Times хабар берди.
Маълум қилинишича, ракета синовлари 17 апрель куни бўлиб ўтган. Эрон мудофаа вазири Азиз Носирзода ракета такомиллаштирилган манёврчанликка эга эканини айтмоқда. Уни THAAD, Patriot каби ҳаво мудофаа тизимлари ва Исроилдаги мавжуд тизимлар тўхтата олмайди.
Ракетанинг инфрақизил ва оптик бошқарув тизимлари GPSʼга таянмасдан аниқ нишонга олиш имконини беради, бу эса навигацияни издан чиқариш учун қўлланадиган электрон уруш усулларини четлаб ўтади. Таҳлилчиларга кўра, бу тизимнинг радиотўсиқлар кучли бўлган шароитларда ҳам ишлашини таъминлайди.
Носирзода агар АҚШ Эронга ҳужум қилса, кучли жавоб қайтарилишидан огоҳлантирмоқда. Эрон ҳарбий идораси раҳбари Теҳрон “қўшни давлатларга душманлик кайфиятида эмаслигини” қайд этган. Бироқ уруш бошланган тақдирда минтақадаги Америка базалари Эрон ҳарбийлари учун “қонуний нишон”га айланади.
Яқинда Яман ҳусийларининг Исроилга ракета ҳужумига изоҳ берар экан, Носирзода Яман “ўз қарорларини ўзи қабул қиладиган мустақил давлат” эканини айтди. У Эрон ушбу можарога алоқадорлиги ҳақидаги айбловларни рад этди.
Афсуски, биз, бир томондан, Америка расмийлари ҳалол ва музокараларга очиқлик ҳақида даъво қилаётган бўлса, бошқа томондан мунтазам равишда турли йўллар билан Ислом республикасига ҳарбий ҳужум билан таҳдид қилаётганини кўрмоқдамиз, деди вазир.
Изоҳ (0)