Хитой шарқидаги Лишуй шаҳридаги кимёвий заводда 7 сентябрь, душанба куни кучли портлаш юз берди. «TASS» хабарига кўра, заводда сақланаётган кимёвий модда — метанол реакцияга киришиб, портлаб кетган.
Ҳозирча ҳодиса қурбонлари ва жабрланувчилари тўғрисида маълумот йўқ.
Хитой халқаро радиоси маълумотларига кўра, «Нанмин хуагунчан» корхонасидаги ёнғинни бартараф этиш учун 300 га яқин ўт ўчирувчи ва 61 дона техника етиб келган. «Ҳозирги вақтда ёнғин бартараф этилган», — дейилади хабарда.
Хитойда сўнгги вақтларда кимё заводларида бундай ҳодисалар тез-тез юз бермоқда. 22 август куни Хуантай уездидаги кимёвий заводда юз берган портлаш оқибатида бир киши ҳалок бўлди, тўққиз киши жабрланди. 1 сентябрга ўтар кечаси эса Лицзин уездидаги заводда портлаш юз бериши оқибатида беш киши ҳалок бўлди.
Энг йирик портлаш 12 август куни Тяньцзинь шаҳридаги порт омборхонасида юз берди. Фожиа оқибатида 160 киши ҳалок бўлди, 800 га яқин одам тан жароҳати олди.
Изоҳ (0)