Хитойда карантинга қарши намойишчилар Си Цзиньпиннинг истеъфосини талаб қила бошлади (видео)

Коронавирус локдаунларига қарши оммавий норозиликлар Хитойнинг йирик шаҳарларига тарқалди, деб ёзади Daily Mail.

28 ноябрга ўтар кечаси Хитойнинг йирик шаҳарларида мамлакат ҳукумати коронавирусга қарши кураш билан изоҳлаётган қатъий чеклов чораларига қарши оммавий намойишлар давом этди.

Пекинда намойишчилар дипломатик муассасалар жойлашган туманда кўчаларга чиқди, уларнинг кўпчилиги мамлакатдаги цензурага қаршилик белгиси сифатида қўлларида оқ қоғозлар кўтариб олган.

https://twitter.com/AskAnshul/status/1596930756118745088

Одамлар «Карантинни бекор қилинг», «Си Цзиньпин истеъфога чиқсин, Коммунистик партия истеъфога чиқсин», «Шинжонни очинг, Хитойни очинг», «Бизга ПЗР-тестлар керак эмас, бизга эркинлик керак» деган шиорлар ва талаблар билан чиққан. Полиция жалб этилган, неча киши қўлга олингани аниқ эмас.

Норозилик ҳаракатлари Хитойнинг Шанхай, Чэнду, Чунцин, Ухань ва Нанкин каби бошқа мегаполисларида ҳам бўлиб ўтди. Университетларда ҳам норозиликлар кучаймоқда, ижтимоий тармоқлар намойишлар акс этган видеоларга тўлиб кетди.

https://twitter.com/nytimes/status/1596918605932728320

Хитой ҳукумати коронавирусга нисбатан «ноль бардошлилик» сиёсатини олиб бормоқда: шаҳарларда бутун бошли даҳалар ёпиб ташланмоқда, касалланганлар билан алоқада бўлган одамлар мажбуран карантинга юборилмоқда, беморлар касалхоналарда изоляция қилинмоқда, мамлакат чегаралари эса аслида ёпиқ бўлиб қолмоқда.

https://twitter.com/CitizenFreePres/status/1596865384044711939

Норозиликлар Шинжон-Уйғур мухтор туманининг Урумчи шаҳридаги турар-жойлардан бирида ёнғин чиққанидан кейин бошланганди. 24 ноябрь куни юз берган ҳодисада камида ўн киши ҳалок бўлиб, яна тўққиз киши жароҳатланганди.

https://twitter.com/JackPosobiec/status/1597051747133845504

Гувоҳлар қайд этишича, локдаун туфайли квартиралар эшиклари ёпиб ташлангани учун, одамлар ташқарига чиқа олмаган, чеклов чоралари сабабли эса қутқарув хизматлари вақтида етиб кела олмаган. Хитой ҳукумати буни рад этмоқда.

Аввалроқ Хитойда кунлик касалланишлар сони пандемия бошидан буён рекорд даражага етгани хабар берилганди. Чунончи, 23 ноябрь куни мамлакатда 31 656 киши касалликка чалинган. South China Morning Post газетаси ёзишича, шу куни Хитойда касалланишлар сони бўйича рекорд ўрнатилган. 24 ноябрь куни эса 32 943 кишида коронавирус аниқланди.