Си Цзиньпин биринчи марта Хитойдаги норозилик намойишларига муносабат билдирди

Хитой Халқ Республикаси раиси Си Цзиньпин Еврокенгаш раҳбари Шарл Мишелга мамлакатда коронавирус чекловларига қарши норозилик намойишлари ортида «ҳафсаласи пир бўлган талабалар» турганини айтди. Бу ҳақда South China Morning Post европалик расмий шахсларга таяниб хабар берди.

Евроиттифоқнинг юқори мансабли амалдорлари айтишича, Си Пекиндаги уч соатлик учрашув чоғида шундай изоҳ берган. Бу Хитой етакчисининг мамлакат бўйлаб авж олган митингларга биринчи марта муносабат билдиришидир.

Шунингдек, Си кексаларнинг вакцинация қилиниши юзасидан хавотир билдирган, аммо коронавирус омикрон штаммининг ўлим даражаси пастлигини эътироф этган. Европалик мансабдорлар фикрича, бу ХХР раҳбарининг чекловларни камайтиришга тайёрлигидан дарак бериши мумкин.

Аввалроқ Хитой Давлат кенгаши бош вазири ўринбосари, коронавирус тарқалиши устидан назорат бўйича масъул бўлган Сун Чунлан норозиликлар фонида коронавирусга қарши чоралар мунтазам оптималлаштирилиши зарурлигини айтганди.

29 ноябрь куни Пекин ва Гуанчжоу маъмурлари COVID-19 га қарши чораларнинг баъзиларини сусайтирган эди.

Хитой ҳукумати коронавирусга нисбатан «нол бардошлилик» сиёсатини олиб бормоқда: шаҳарларда бутун бошли даҳалар ёпиб ташланмоқда, касалланганлар билан алоқада бўлган одамлар мажбуран карантинга юборилмоқда, беморлар касалхоналарда изоляция қилинмоқда, мамлакат чегаралари эса аслида ёпиқ бўлиб қолмоқда.

Норозиликлар Шинжон-Уйғур мухтор туманининг Урумчи шаҳридаги турар-жойлардан бирида ёнғин чиққанидан кейин бошланганди. 24 ноябрь куни юз берган ҳодисада камида ўн киши ҳалок бўлиб, яна тўққиз киши жароҳатланганди.

Гувоҳлар қайд этишича, локдаун туфайли квартиралар эшиклари ёпиб ташлангани учун, одамлар ташқарига чиқа олмаган, чеклов чоралари сабабли эса қутқарув хизматлари вақтида етиб кела олмаган. Хитой ҳукумати буни рад этмоқда.

Норозилик ҳаракатлари Хитойнинг Шанхай, Ченду, Чунсин, Ухань ва Нанкин каби бошқа мегаполисларида ҳам бўлиб ўтди. Университетларда ҳам норозиликлар кучайган.

Кейинроқ намойишчилар Си Цзиньпиннинг истеъфосини талаб эта бошлади. Одамлар «Карантинни бекор қилинг», «Си Цзиньпин истеъфога чиқсин, Коммунистик партия истеъфога чиқсин», «Шинжонни очинг, Хитойни очинг», «Бизга ПЗР-тестлар керак эмас, бизга эркинлик керак» деган шиорлар ва талаблар билан чиққан.