Гаитининг Кап-Аитьен шаҳрида ёнилғи ташувчи автоцистерна йўл-транспорт ҳодисасига учради. Сўнг юк машинасида кучли портлаш юз берди, оқибатда 40 дан ортиқ одам ҳалок бўлди, деб ёзади «Korrespondent.net».
Қайд этилишича, воқеа 13 декабрь куни тунда содир бўлган. Шаҳар ҳокимиятининг вакили Патрик Альмонорнинг айтишича, дастлаб автоцистерна ҳайдовчиси мотоцикл билан тўқнашиб кетмасликка уриниб, аварияга учраган.
Шундан сўнг маҳаллий аҳоли ёнилғи олиш илинжида автоцистерна атрофига йиғилган вақтда машина портлаб кетган. Оқибатда 40 дан ортиқ одам ҳалок бўлган, камида 47 киши жароҳат олган.
Эслатиб ўтамиз, Гаитида 14 август куни 7,2 магнитудали зилзила юз берганди. Унинг кетидан бирма-бир афтершоклар, хусусан, 5,2 магнитудали такрорий ерости силкинишлари кузатилган. Зилзила эпимаркази пойтахт Порт-о-Пренсдан 125 километр ғарбда жойлашган.
Аввал қурбонлар сони 1297 кишига, кейинроқ 1419 кишига, яна бир муддат ўтиб 2248 кишига етгани, уларнинг сони яна ошиши мумкинлиги ҳақида хабар қилинганди.
Шунингдек, зилзиладан кейин Гаити қирғоқларига «Грэйс» тропик бўрони урилган. Унинг оқибатида қидирув-қутқарув ишлари вақтинча тўхтатилган.
Изоҳ (0)