Хитой жанубида China Eastern авиакомпаниясининг Boeing 737 самолёти ҳалокатга учради, дея хабар берган CGTV телеканали.
Хитой фуқаролик авиацияси бошқармаси ахборотига кўра ҳаво кемаси бортида 123 нафар йўловчи ва 9 нафар экипаж аъзоси бўлган. Ҳали авиаҳалокат сабаблари ва омон қолганлар юзасидан расмий ахборот берилмаган. Фавқулодда ҳодиса фонида Boeing акцияларининг нархи 7 фоизга арзонлашган.
Лайнер Хитойнинг Кунмин шаҳридан Гуанчжоуга парвоз қилаётганди. Самолёт Гуанси автоном вилояти ҳудудига қулаган. Авиаҳалокат юз берган ҳудудда ўрмон ёнғин кузатилган ва ҳодисани бартараф қилиш учун 500 дан зиёд қутқарувчи жалб этилган. China Eastern компанияси авиаҳалокат оқибатида ҳалок бўлганлар орасида хориж давлатлари фуқароларининг йўқлигини маълум қилган. Ижтимоий тармоқларда самолёт ҳалокати акс этган видеолар тарқалган.
Шунингдек, авиаҳалокат туфайли China Eastern ўз ихтиёридаги Boeing 737-800 самолётларидан фойдаланишни вақтинча тўхтатган, дейилади CGTN хабарида. Reuters агентлигининг FlightRadar24 маълумотларига асосланиб ёзишича компанияда бундай моделдаги 109 та учоқ мавжуд.
Изоҳ (0)