Хитойдаги касалхона ёниб кетиши оқибатида 29 киши, жумладан, беморлар, уларнинг оила аъзолари ва тиббиёт ходимлари ҳалок бўлди. Бу ҳақда Chinа Daily хабар берди.
Маълум қилинишича, ёнғин 18 апрель куни маҳаллий вақт билан соат 13:00 атрофида Чангфенг касалхонасининг стационар бўлимида содир бўлган. Қутқарувчилар воқеа жойига етиб келганидан кейин 30 дақиқа ичида ёнғинни ўчирган. 2 соатдан сўнг қидирув-қутқарув операцияси тўлиқ якунланган.
Касалхонадаги 71 нафар бемор эвакуация қилинган, бироқ 29 киши ҳодиса оқибатида ҳалок бўлган. Ёнғин қурбонларининг 39 нафари Пекин бўйлаб тўққизта тиббиёт муассасасида даволанмоқда. Ҳозирда ёнғин сабаблари ўрганилмоқда, дастлабки сабабларга кўра, ёнғинга таъмирлаш ишлари сабаб бўлган.
Маҳаллий ОАВ маълумотларига кўра, ёнғин Пекиндаги сўнгги йилларда содир бўлган энг ҳалокатли воқеага айланди. 2017 йилда Пекин жанубидаги ёнғинда 19 киши ҳалок бўлган, 8 киши жароҳатланганди.
Изоҳ (0)