«Дарё» нашри 28 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
АҚШ Украина туфайли Тайванга қурол-яроғ бера олмади. Қурол етказиш масаласи қандай ҳал қилинади?
Ҳарбий ёрдамнинг катта қисми Украинага йўналтирилгани учун, АҚШ ҳукумати Тайванни барча зарур қурол-яроғ билан таъминлай олмаслигидан хавотирланмоқда. Бу ҳақда The Wall Street Journal АҚШ Конгресси ва ҳукуматидаги манбаларига таяниб хабар берди.
Нашр маълумотларига кўра, Вашингтон Тайванга қурол-яроғ етказиб бериш бўйича қарийб 19 миллиард долларга орқада қолмоқда. Манбаларнинг айтишича, Украинага етказиб берилаётган қурол-яроғлар сони айни пайтда АҚШнинг Тайванни қуроллантириш бўйича стратегиясининг узоқ муддатли талабларига мос келмайди.
Орол ҳалигача АҚШдан 208 та танкка қарши мажмуалар ва 215 та Stinger ҳаво ҳужумига қарши ракета мажмуаларини олгани йўқ, ваҳоланки улар учун 2015 йил декабрида буюртма берилган.
«Пандемия натижасида келиб чиққан етказиб беришлар занжири билан боғлиқ муаммолар, кўплаб тизимларда ишлаб чиқариш ҳажмини қисқартирди ва улар Россиянинг Украинадаги операцияси талабни ошириб юборишидан аввалроқ ҳам қийинчиликларга дуч келганди», — деб ёзади нашр.
Пентагон вакили Сабрина Сингх маълум қилишича, Вашингтон Тайван ва Украинага ўзини ҳимоя қилиш имкониятини тақдим этиш устида ишламоқда. Май ойида Пентагон Тайванга қурол-яроғ етказиб беришдаги оқсашларга Киев сабабчи эмаслигини айтганди. Мудофаа идораси аниқлик киритишича, Украинани қуроллантириш АҚШ захиралари ҳисобидан амалга ошириляпти ва ҳозирда Тайванга янги қуроллар юборилмоқда.
Тўқаев Путиннинг таклифи билан Москвага борди
Қозоғистон президенти Қосим-Жўмарт Тўқаев Россия президенти Владимир Путиннинг таклифи билан Москвага борди, деб ёзади Tengrinews. Қайд этилишича, бугун Москвада давлат раҳбарлари музокаралар ўтказади. Бундан ташқари, икки мамлакат етакчилари видеоконференцалоқа режимида Қозоғистон ва Россия минтақалараро ҳамкорлик форумида қатнашади.
Аввалроқ Россия президенти матбуот котиби Дмитрий Песков ташриф чоғида ҳужжатлар имзоланишини айтганди. Айнан қандай ҳужжатлар эканига Песков аниқлик киритмади. Икки мамлакат етакчиларининг ушбу учрашуви Тўқаев 26 ноябрь куни иккинчи марта Қозоғистон президенти лавозимига киришганидан буён биринчиси бўлади. Путин сайловлардан кейин Тўқаевни қайта сайлангани билан биринчилардан бўлиб табриклаганди.
Хитойда карантинга қарши намойишчилар нега Си Цзиньпин истеъфосини талаб қилмоқда?
Коронавирус локдаунларига қарши оммавий норозиликлар Хитойнинг йирик шаҳарларига тарқалди, деб ёзади Daily Mail. 28 ноябрга ўтар кечаси Хитойнинг йирик шаҳарларида мамлакат ҳукумати коронавирусга қарши кураш билан изоҳлаётган қатъий чеклов чораларига қарши оммавий намойишлар давом этди.
Пекинда намойишчилар дипломатик муассасалар жойлашган туманда кўчаларга чиқди. Одамлар «Карантинни бекор қилинг», «Си Цзиньпин истеъфога чиқсин, Коммунистик партия истеъфога чиқсин», «Шинжонни очинг, Хитойни очинг», «Бизга тестлар керак эмас, бизга эркинлик керак» деган шиорлар ва талаблар билан чиққан.
Полиция жалб этилган, ҳозирда неча киши қўлга олингани аниқ эмас. Норозилик ҳаракатлари Хитойнинг Шанхай, Ченду, Чунсин, Ухань ва Нанкин каби бошқа мегаполисларида ҳам бўлиб ўтди. Университетларда ҳам норозиликлар кучаймоқда, ижтимоий тармоқлар намойишлар акс этган видеоларга тўлиб кетди.
Хитой ҳукумати коронавирусга нисбатан «нол бардошлилик» сиёсатини олиб бормоқда: шаҳарларда бутун бошли даҳалар ёпилиб, касалланганлар билан алоқада бўлган одамлар мажбуран карантинга юборилмоқда, беморлар касалхоналарда изоляцияда, мамлакат чегаралари эса аслида ёпиқ ҳолатда.
Норозиликлар Шинжон-Уйғур мухтор туманининг Урумчи шаҳридаги турар жойлардан бирида ёнғин чиққанидан кейин бошланганди. 24 ноябрь куни юз берган ҳодисада камида ўн киши ҳалок бўлиб, яна тўққиз киши жароҳатланганди.
Гувоҳлар қайд этишича, локдаун туфайли квартиралар эшиклари ёпиб ташлангани учун, одамлар ташқарига чиқа олмаган, чеклов чоралари сабабли эса қутқарув хизматлари вақтида етиб кела олмаган. Айни вазиятда Хитой ҳукумати буни рад этмоқда.
Ўзбекистонда ютуқли телеўйинлар истеъмолчилар ҳуқуқини бузаётгани маълум қилинди
Истеъмолчилар ҳуқуқларини ҳимоя қилиш агентлиги телеканалларда эфирга узатилган телеўйинда фуқароларнинг ютуқ пуллари тўлаб берилмаганини маълум қилди. Қайд этилишича, агентликка республиканинг турли ҳудудларидан Zo‘r TV телеканалида намойиш этилган «Омадингизни берсин» ўйинида қўлга киритган ютуқларини олиш имкони бўлмаётгани ҳақида мурожаатлар келиб тушган.
Бугунги кунга келиб ушбу телеўйини иштирокчиларининг умумий ютуқлари жами 2 миллиард сўмни ташкил этади. Ўйин Mia-Maa МЧЖ ҳомийлигида ушбу савдо белгисидаги маҳсулотларнинг харидорлари ўртасида ўтказилмоқда. Телеўйиннинг соврин жамғармаси турли ютуқлардан ташкил топган:
Намойиш этилган кўрсатувнинг жами 15 та сони ғолибларидан фақат 3 та сонидан иштирокчилар ўз ютуғини олган, холос. Қолган 55 иштирокчи бугунги кунгача совринларини кутмоқда.
Агентликнинг махсус комиссияси томонидан Mia-Maa МЧЖга нисбатан «Реклама тўғрисида»ги Ўзбекистон Республикаси қонунининг 6 ва 21-моддалари талаблари бузилгани ҳолати бўйича иш қўзғатилган ва камчиликларни бартараф этиш юзасидан кўрсатма берилган.
Шунингдек, Истеъмолчилар ҳуқуқларини ҳимоя қилиш агентлиги томонидан тўпланган ҳужжатлар ҳолатига ҳуқуқий баҳо бериш учун, маълумотлар ҳуқуқни муҳофаза қилувчи органларга тақдим этилган.
Изоҳ (0)