“Реал” бош мураббийи Карло Анчелотти мавсум якунлангач, жамоани тарк этади. Италиялик мутахассиснинг Мадрид клубини тарк этиши ойдинлашди, ортга йўл йўқ.
Анчелотти аллақачон кетиш бўйича келишиб қўйган эди. Кубок финали бу ерда рол ўймаган
Карлонинг келажаги Испания Кубоги финалидан анча олдин шубҳа остида эди. Marca март ойида “Арсенал”га қарши баҳс италияликнинг клубдаги келажагини белгилаб бериши ҳақида ёзган эди.
Чемпионлар Лигаси чорак финалидан ўрин олган жавоб ўйинидан сўнг, клубга яқин бўлган журналист Рамон Алварес инсайд билан ўртоқлашди: Анчелотти ва Перес аллақачон мавсум якунида мураббийнинг кетиши бўйича келишиб олган. Томонлар ҳаммасини муҳокама қилиб, ҳозир хайрлашишнинг айни вақти деган хулосага келган. Мақсад мавсумни кубок билан якунлаш ва Ла Лигада ғолиб чиқишга ҳаракат қилиш эди, аммо клуб ўзгаришлар вақти келганини тушунади.
Якунда кубок қўлдан чиқарилди, аммо ўйиндан сўнг Карлонинг кетиши ҳақидаги хабарларни бошқа журналистлар ҳам тасдиқлай бошлади. The Athletic нашри мухбири Марио Кортегананинг маълум қилишича, Анчелотти Бразилия терма жамоаси билан келишиб олган ва июнь ойида жамоани қабул қилиб олади.
Sky Sports мураббий “Барселона” билан финалдан сўнг дарҳол кетиши мумкинлиги ҳақида хабар берган эди, аммо Кортегана буни рад этди — Карло Ла Лигада мавсумни якунлайди ва клублар ўртасидаги жаҳон чемпионати бошланишидан олдин кетади. Карлонинг ўзи матбуот анжуманларида доимо қолишни хоҳлашини такрорларди: “Менинг келажагим? Умид қиламанки, “Мадрид”да имкон қадар узоқ вақт қоламан”.
AS хабарига кўра, Анчелотти Бразилия футбол федерацияси билан 2030 йилгача мўлжалланган шартнома бўйича келишиб олган, аммо мураббий ЖЧ—2026 дан кейин исталган вақтда кетиш имкониятига эга бўлади — бундай банд келишувга киритилади. Шартноманинг аниқ рақамлари ҳақида ҳозирча маълумот йўқ, аммо Бразилиянинг UOL Esporte нашри Карло дунёнинг энг кўп маош олувчи мураббийларидан бирига айланишини ёзмоқда.
Давиде Анчелотти отаси билан терма жамоага бормайди — Relevo хабарига кўра, у фаолиятини бош мураббий сифатида бошлайди. Аввалроқ унинг хизматларига “Реймс” ва “Базел” клублари қизиқиш билдирганди, аммо Давиденинг ўзи “Реал”дан кетишни истамаган.
Бразилия футбол федерацияси Анчелоттини 2023 йилдан буён ўз сафига қўшиб олишга уриниб келаётган эди, аммо якунда мураббий “Мадрид”да қолди ва шартномани 2026 йилгача узайтирди. The Athletic хабарига кўра, федерация Карло ундан маънавий қарздор деб ҳисоблайди.
Анчелоттининг ўрнини ким босади? Алонсо — фаворит
Хаби Алонсо Карло Анчелоттининг ўрнини эгаллаш учун номзодлар қаторида фаворит сифатида кўрилмоқда.
Фабрицио Романонинг таъкидлашича, 2024 йилда Хаби “Бавария” ва “Ливерпуль” таклифларини рад этган, чунки у “Мадрид”дан кутган, клуб раҳбарияти эса баскнинг иши ҳақида доимо илиқ фикрда бўлган. Флорентино Перес Алонсони Анчелоттининг ўрнига идеал номзод сифатида кўрмоқда. “Реал” учун у мутлақ фаворит.
Шу ўринда савол туғилади: ҳозир “Реал” клублар ўртасидаги жаҳон чемпионатига ким олиб боришини ҳал қилмоқда. Кортегананинг маълумотларига кўра, иккита эҳтимолий сценарий мавжуд.
- Вақтинчалик мураббий: Сантяго Солари жамоани клублар ўртасидаги Жаҳон Чемпионатига олиб боради. Ундан кейин Алонсо ўз ўрнини бўшатади.
- Хаби июнь ойининг бошиданоқ жамоани қабул қилиб олади ва у билан бирга клублар мундиалига боради. Ҳаммаси янги мураббийнинг қарорига боғлиқ.
Германиялик инсайдер Флориан Плеттенбергнинг маълум қилишича, “Байер” Алонсо учун 15-20 млн евро миқдорида товон пули олмоқчи.
Немис клуби бош директори Фернандо Карро апрель ойи ўрталарида мураббийнинг истеъфоси ҳақида гапирган ва тез орада қарор қабул қилинишини кутаётганини таъкидлаганди: “Хабининг шартномасида товон пули миқдори йўқ, аммо бизда унинг кетиши бўйича жентлменча келишув бор. Агар Хаби аввал ўйнаган жамоа келса, музокаралар столига ўтирамиз ва унга халақит бермаймиз. Лекин биз ёзгача кута олмаймиз. Бизга яқин 3-4 ҳафта ичида ечим керак”.
Юрген Клоппнинг тайинланиши ҳақида ҳам хабарлар бор эди: Marca нашри “Реал” икки марта немис билан боғланиб, унинг режалари ҳақида сўрагани ҳақида ёзганди. Клоппнинг агенти Марк Козицкенинг сўзларига кўра, Юрген “Red Bull” тизимидаги ролидан мамнун, у ерга бор эътиборини жамлаган.
Плеттенбергнинг ишонтиришича, Клопп камида 2026 йилгача мураббийлик фаолиятига қайтмоқчи эмас.
Тез орада Карло Анчелотти истеъфога чиқарилади ва юқоридаги икки сценарийдан бири юз беради. Буёғи энди вақт масаласи.
Изоҳ (0)