Мадриднинг “Реал” клуби бош мураббийи Карло Анчелотти жорий мавсум якунланишидан аввалроқ жамоани тарк этиши мумкин. Бу ҳақда Sky Sports нашрига таяниб Championat хабар бермоқда.
Манбага кўра, 65 ёшли мутахассис 26 апрель куни “Барселона”га қарши бўладиган Испания Кубоги финалидан сўнг ўз лавозимидан кетиши кутилмоқда.
Эслатиб ўтамиз, яқинда “Реал” Чемпионлар Лигасининг чорак финалида “Арсенал”га умумий ҳисобда 1:5 ҳисобида мағлуб бўлиб, мусобақадан чиқиб кетди. Ушбу мағлубиятдан кейин италиялик мутахассиснинг “қироллик клуби”даги курсиси “қимирлаб қолгани” айтилмоқда.
Аввалроқ Анчелоттининг ўрнига “Ливерпуль” собиқ устози Юрген Клопп тайинланиши мумкинлиги ҳақида хабар чиққан эди.
Ла Лига турнир жадвалида “Реал” 31 турдан сўнг 66 очко билан иккинчи ўринда бормоқда. Пешқадам “Барселона” 70 очкога эга.
Карло Анчелотти “Реал”ни 2021 йилдан бери бошқариб келмоқда. У бунгача ҳам 2013–2015 йилларда клубда ишлаган. Анчелотти “қироллик клуби” билан бирга 2 марта Ла Лига чемпиони (2021/22, 2023/24) ҳамда 3 марта Чемпионлар Лигаси (2013/14, 2021/22, 2023/24) ғолиби бўлган.
Изоҳ (0)