2024 йил Лили Гладстоун учун омадли бошланди. 96-“Оскар” маросимида энг яхши аёл роли учун мукофотни Эмма Стоунга бой берган бўлса-да, актриса барибир тарихга кирди. У дунёдаги энг нуфузли кино мукофотга номзоди қўйилган биринчи тубжой америкаликдир.
Резервациядан “Оскар” тақдирлаш маросимигача босиб ўтилган йўл
50 йил олдин “Оскар” маросимида аудитория Марлон Брандонинг ўрнига мукофот олишга чиққан ҳинду Сачин Литтлфезерни қаттиқ танқид қилганди, чунки у ўз нутқида ҳинду халқига кўпроқ эътибор қаратиш кераклигини таъкидлаган эди. Куни кеча Лили Гладстоуннинг миннатдорлик нутқи ҳам деярли шу мавзуда бўлди, лекин энди Голливуд ва бутун дунё уни ҳайратланиб тинглади. Актрисанинг фильмографияси нисбатан кам эканига қарамасдан, унинг экрандаги тубжой халқларни гавдалантиришдаги ҳиссаси беҳисобдир.
Актриса бўлиш Лилининг болалигидан бери асосий орзуси эди. Ўзининг айтишича, “Юлдузлар жанги” фильми уни шундай қарорга келишга ундайди, фильмдаги пахмоқ эвокларни аслида актёрлар ўйнаётганини билиб, ўзи ҳам шундай қилмоқчи бўлган. Қораоёқ қабиласи наслидан бўлган Гладстоун резервацияда, Монтананинг тоғли манзаралари билан ўралган маконда яшаган. Кейин у оиласи билан Сиэттлга кўчиб ўтиб, актёрлик факультетига ўқишга кирган.
Университетни тугатгач, Лили ўқитувчилик қилишни бошлайди ва Арно Десплечиннинг “Жимми Пикар” фильмида Эрта тонг исмли ҳинду аёлининг эпизодик ролини ўйнагунига қадар театрда актрисалик фаолиятини бошлайди. Кейинги роли билан Лили Гладстоун профессионал эътирофга сазовор бўлади. Таниқли мустақил кинорежиссёр Келли Рейхардтнинг “Бир нечта аёл” фильмида чорвадор ролини ижро этган Гладстоун ўзининг биринчи мукофотига сазовор бўлади. Кейинчалик у “104-хона”, “Миллиардлар” ва “Резервация итлари” сериаллари ва “Номаълум мамлакат” фильмида бош ролни ўйнайди.
Пандемия бошланганда актриса кинони тарк этиш ва иккинчи севимли машғулоти — асалариларни ўрганиш ҳақида жиддий ўйлай бошлайди. Мартин Скорсезе у билан боғланиб, XXI аср бошларида нефть манбаларининг топилиши туфайли бойиб кетган осейжи қабиласидан бўлган Молли Кайл ролини таклиф қилганида, у ўзини қовоғариларнинг ўлими ҳақидаги илмий тадқиқотга бағишламоқчи эди.
Бу Девид Граннинг 1920 йилларда Оклахома резервациясида очкўз оқ танлиларнинг тубжой америкаликларга нисбатан содир этган қотилликлари ҳақида ҳикоя қилувчи “Гулли ой қотиллари” китобининг экранга мослашуви эди. Скорсезе Гладстоунни “Бир нечта аёл” фильмида кўргач, бундай мураккаб, ҳиссий жиҳатдан талабчан ролга ундан бошқа муносиброқ актриса йўқлигини тушунади.
Лили Гладстоун иштирок этган фильмлар
“Бир нечта аёл” (2016)
- Жанр: драма
- Режиссёр: Келли Рейхардт
- Ролларда: Лаура Дерн, Кристен Стюарт, Мишель Уильямс, Лили Гладстоун
Монтана тоғ манзараси фонида уч аёл тақдири ҳақидаги фильм. Адвокат Лаура (Лаура Дерн) олдинги иш жойидаги қоровулни гаровга олган собиқ мижозини тинчлантириш учун барча нотиқлик маҳоратини ишга солишга мажбур бўлади. Жина (Мишель Уильямс) эри билан нолдан уй қуради, лекин бу уларнинг муносабатлари дарз кетишига сабаб бўлади. Ранчо ишчиси ёлғиз аёл Жейми эса (Лили Гладстоун) маҳаллий мактабда ҳуқуқдан дарс берадиган ёш адвокат Бет (Кристен Стюарт) билан танишади. Мураккаб тақдирлар ҳақида мулоҳаза юритишга ундайдиган ажойиб фильм.
“Биринчи сигир” (2019)
- Жанр: драма, вестерн
- Режиссёр: Келли Рейхардт
- Бош ролларда: Эви лақабли сигир, Жон Магаро, Орион Ли, Эвен Бремнер
Кўчманчилар Американинг ёввойи ерларини ўзлаштирмоқда. Улар орасида ёлғиз ошпаз ва Хитойдан қочиб кетган муҳожир ҳам бор. Иккиси биргаликда бизнес бошлайди: улар энг мазали печеньеларни тайёрлашади, ҳатто маҳаллий бой деҳқон ҳам фақат улардан харид қилади. Бироқ деҳқон печеньедаги сирли таркибий қисм ўзига тегишли сигирнинг сути эканлигини билмайди — ёш тадбиркорлар ҳар кеча ундан сут ўғирлашади. Фильмда Лили Гладстоун ер эгасининг хотини сифатида кичик ролни ўйнаган.
“Номаълум мамлакат” (2022)
- Жанр: драма
- Режиссёр: Морриса Молц
- Ролларда: Лили Гладстоун, Раймонд Ли, Ричард Рей Уитмен, Лаиней Беаркиллер Шангроуҳ
Американинг ғарбий ландшафтлари бўйлаб “Кўчманчилар мамлакати” руҳини эслатувчи саргузашт фильм. Бувиси вафотидан кейин Тана (Лили Гладстоун) Техасга боришга қарор қилади, йўлда қариндошлариникига киради, мотелларда ва йўлда турли одамлар билан учрашади. У бутун умри давомида оиласининг тарқоқлигидан азоб чекади. Америка туб халқларининг аъзоси сифатида Танага умумий тарих, маданият ва тилга эга бўлган жамиятга тегишлилик ҳисси етишмайди. Жисмонийдан кўра кўпроқ руҳий саёҳатда у ўз илдизлари билан қайта боғланишга ҳаракат қилади. Гладстоун мазкур роли билан “Энг яхши аёл роли учун” номинациясида “Готэм” мукофотни қўлга киритади.
“Гулли ой қотиллари” (2023)
- Жанр: драма, жиноят, тарих
- Режиссёр: Мартин Сcорсезе
- Ролларда: Леонардо Ди Каприо, Роберт Де Ниро, Лили Гладстоун, Жесси Племонс
Обрў-эътиборга эга амаки Уилям Хейл (Роберт Де Ниро) Оклахомада, осейжи ҳиндулари резервациясида яшайди ва уларнинг ерларида топилган нефть туфайли қандай бойиб кетишларини ўз кўзи билан кузатади. Уруш пайтида ошпаз бўлиб хизмат қилган, аёлларга суяги йўқ жияни Эрнест Беркхартнинг (Леонардо Ди Каприо) келиши унга жуда қўл келади. Хейл жиянини бадавлат ҳинду оиласидан бўлган ёш аёл Молли Кайлга (Лили Гладстоун) уйланишга ундайди. “Гулли ой қотиллари” бу — Америка фожиасининг совуққон ҳикояси бўлиб, унинг шафқатсизлиги бутун ҳинду халқининг меҳрибонлигини биргина нигоҳига сиғдира олган Гладстоуннинг ажойиб актрисалик ишида намоён бўлади.
Изоҳ (0)