Россияда гипертовушли ракета ясаш сирларини Германияга сотганликда айбланган олим 14 йилга озодликдан маҳрум қилинди. Бу ҳақда The Moscow Times нашри хабар берди.
Манбада айтилишича, 77 ёшли олим Анатолий Маслов давлатга хиёнатда айбланиб, ҳибсга олинган. У гипертовушли ракеталар ясаш бўйича муҳим ва махфий ҳужжатларни Германия хавфсизлик хизмати вакилларига етказиб беришда гумонланмоқда.
Олимга 14 йиллик қамоқ жазоси бериш тўғрисида Санкт-Петербург шаҳар суди қарор чиқарган. Анатолий Маслов ўзига қўйилган айбловларни рад этган.
Прокурорлар олим учун 17 йиллик қамоқ жазосини сўраган. Унинг ҳимоячилари эса, олимнинг ёши ва соғлиғи билан боғлиқ муаммолар туфайли бундай узоқ муддат умрбод қамоқ жазосига тенг бўлиши мумкинлигини таъкидлаган. Маслов февраль ойида тергов ҳибсхонасида юрак хуружига учрагани судда қўшимча маълумот сифатида келтирилган.
Анатолий Маслов Россия Фанлар академиясининг Сибир бўлими таркибига кирувчи Назарий ва амалий механика институтида бош илмий ходим бўлиб ишлаган. У узоқ йиллар давомида ҳарбий соҳада тадқиқотлар олиб боргани айтилган.
2022 йилдан бери Россия ҳукумати гипертовушли ракеталар соҳасида фаолият юритган 3 нафар олимни ҳибсга олган. Уларга халқаро конференцияларда қатнашиб, мамлакат сирларини сотганлик айби қўйилган.
Изоҳ (0)