Сурхондарё вилоятининг Шўрчи туманида икки кишини ўлдирганликда гумон қилинган 38 ёшли шахс Россиянинг «Домодедово» аэропортида қўлга олингани тўғрисида хабар берилганди. Вилоят ИИБ қотилликнинг содир этилишига боғлиқ маълумотлар билан бўлишди.
Маълум бўлишича, Сариосиё тумани «Тоқчиён» маҳалласида рўйхатда турган, аммо Тошкент вилояти Ангрен шаҳрида яшовчи С.Н. Россияга ишлашга кетиб, турмуш ўртоғи З.М. унга хиёнат қилиб келганини билиб қолган. 2022 йилнинг январь ойида у Ўзбекистонга қайтиб келган. Келиши билан вояга етмаган 3 нафар фарзандини ўзи билан олиб қолиб, турмуш ўртоғини у билан ажрашиш мақсадида уйдан чиқариб юборган.
Шундан сўнг эр-хотин ўртасида фарзандлар кимда қолиш-қолмаслиги устидан тортишув бошланган. С.Н. собиқ хотинининг акасига З.М. уни тинч қўйиши лозимлигини, фарзандларини олиш учун судга ариза бермаслигини, агар ариза берган тақдирда уни ўлдириш билан таҳдид қилган. Бироқ З.М. суд орқали фарзандларини ўзига олиш учун даъво ариза ёзиб, тақдим қилиш чораларини кўраётганини билиб, ундан ўч олиш мақсадида режа тузган.
Турмуш ўртоғи З.М.га ўғли А.ни кўрсатиш учун олиб боришини, у билан ярашмоқчи эканини айтиб, Nexia-3 русумли транспорт воситасида турмуш ўртоғининг онаси Х.Х. билан яшаб келаётган Шўрчи тумани «Яккабоғ» маҳалласидаги яшаш уйига борган. Ўғлини қайнонаси Х.Х. ва турмуш ўртоғи З.М. билан учраштирган. Шунда кейин ўғлини машина ичига қўйиб, қайнонаси ва хотинининг ухлашини кутган. Ўзига қулай вақт пайдо бўлганидан сўнг яшаш уйига кириб, айвонда ухлаб ётган қайнонаси ва хотинининг бўйин қисмига ўткир кесиб-санчувчи жисм билан тан жароҳати етказган. Улар кўп қон йўқотиш натижасида воқеа жойида вафот этган.
Ҳолат юзасидан вилоят прокуратураси томонидан Жиноят кодексининг 97-моддаси (қасддан одам ўлдириш) 2-қисми «а, ж» бандлари билан жиноят иши қўзғатилган.
ИИВ Жиноят қидирув бош бошқармаси ҳамда Тожикистон ИИВ Жиноят қидирув бош бошқармаси билан ҳамкорлигида амалга оширилган қидирув ишлари натижасида гумондор Н.С. жавобгарликдан қутулиш мақсадида Сурхондарё вилоятидан Тожикистонга ўтиб, у ердан Россияга кетгани аниқланган.
Россияда хизмат сафарида бўлган Сурхондарё вилояти ИИБ Жиноят қидирув бошқармаси ходимлари томонидан россиялик ҳамкасблари ҳамкорлигида гумондор шахс Москва вилоятининг «Домодедово» аэропортида қўлга олинган.
Аввалроқ Жиззахда икки ука опаси билан спиртли ичимлик ичиб ўтирган йигитни калтаклаб, ўлдиргани, Бухорода қўшни аёлни ўроқ билан ўлдирган 71 ёшли эркакка ҳукм ўқилгани, Бухорода хотинини қасддан ўлдирган эр 13 йилга қамалгани тўғрисида хабар берилганди.
Изоҳ (0)