Москва иккинчи Ғарбий округ ҳарбий суди асли ўзбекистонлик бўлган ва муҳожирлар ҳуқуқлари ҳимоячиси Баҳром Ҳамроевни “терроризмни оқлаш” ва “террорчилик фаолиятини ташкил этиш”да айбдор деб топиб, 14 йилга озодликдан маҳрум қилди. Бу ҳақда суд матбуот хизматига таяниб, “ТАСС” хабар бермоқда.
“Суд Ҳамроевни 14 йилга қаттиқ режимдаги колонияга ҳукм қилди, у уч йилни қамоқхонада ўтказиши керак”, — дея суд матбуот котиби Ирина Жирновадан иқтибос келтирган агентлик.
Томонлар баҳсида айбловчи тараф Ҳамроевни 21 йилга озодликдан маҳрум қилишни сўраган.
Ҳамроевга нисбатан Россия Федерацияси Жиноят кодексининг 205.2-моддаси 2-қисми (терроризмни оммавий оқлаш) ва 205.5-моддасининг 1-қисми (Россия Федерацияси қонунчилигига мувофиқ террорчи деб топилган ташкилот фаолиятини ташкил этиш) айбловлари қўйилган.
Тергов органлари маълумотларига кўра, Ҳамроев “Ҳизб ут-Таҳрир” халқаро террорчилик гуруҳи аъзоси ҳисобланади.
Россия ҳуқуқ-тартибот идоралари Ҳамроевга нисбатан 2022 йил февраль ойи охирида жиноий иш очган эди. Хавфсизлик кучлари ҳуқуқ ҳимоячисининг ижтимоий тармоқлардаги постларини “Ҳизб ут-Таҳрир” партиясини қўллаб-қувватлаш ва “терроризмни оқлаш” деб ҳисоблаган. 25 февраль куни Ҳамроев тергов изоляторига жойлаштирилган.
Ҳамроевга иккинчи модда бўйича иш очилгани октябрь ойида маълум бўлди. У “Ҳизб ут-Таҳрир” билан алоқадорликда гумон қилиниб, таъқибга учраган мусулмонларга ёрдам бергани учун “террорчи ташкилот фаолиятини ташкил этиш”да айбланган.
Ҳамроев ўз айбини тан олмади. У ҳеч қачон “Ҳизб ут-Таҳрир”га аъзо бўлмаганини, фақат унинг аъзоси деб гумон қилинган одамларнинг ҳуқуқларини ҳимоя қилиш билан шуғулланганини таъкидлади.
ОАВ ёзганидек, сўнгги йилларда Ҳамроев доимий равишда Россия расмийлари томонидан босимни ҳис қилиб келган. 2016 ва 2017 йилларда ФХХ ходимлари унинг квартирасида тинтув ўтказган. Аввалроқ 2010 йилда Ҳамроев ФХХ ходими томонидан калтакланган, 2011 йилда уйи подездида номаълум шахслар пистирма билан унга ҳужум қилган. Ушбу ҳодисаларнинг ҳеч бири текширилмаган.
2018 йилда ҳуқуқ ҳимоячиси ўз квартирасида икки хорижликни сохта рўйхатга олишда айбдор деб топилиб, 200 минг рубль миқдорида жаримага тортилган. 2019 йилда Ҳамроев Тожикистондаги сиёсий маҳбусларни озод этиш талаби билан Қизил майдонда бир кишилик пикет ўтказгани учун ҳибсга олинган ва кейинчалик жаримага тортилган. Орадан бир неча ой ўтиб, ҳуқуқ ҳимоячиси Москвада “Адолатли сайловлар учун” акциясини ташкиллаштиришда иштирок этганликда айбланиб, яна ҳибсга олинди ва жаримага тортилди.
Маълумот учун Баҳром Ҳамроев 1963 йил 12-октябрда Бухоро вилояти Ғиждувон туманида туғилган. 1980 йилларнинг охири — 1990 йилларнинг бошларида Ўзбекистон “Бирлик” халқ ҳаракати фаоли бўлган. 1992 йилда Ҳамроев Россияга кўчиб ўтган ва у ерда муҳожирлар ҳуқуқларини ҳимоя қилишни бошлаган.
Изоҳ (0)