Москвада Ўзбекистон фуқароси Жавоҳир Эшонқулов ИШИД халқаро террорчилик ташкилотини молиялаштиришда айбдор деб топилиб, саккиз йилга озодликдан маҳрум этилди, деб хабар беради RT.
Россия Федерал хавфсизлик хизматининг маълум қилишича, 2-Ғарбий ҳарбий округ судининг Эшонқуловга нисбатан ҳукми ҳозирда кучга кирган.
Идора маълумотларига кўра, эркак фуқароларни йўллаш ва жангариларни Афғонистон ҳамда Покистонга юбориш билан шуғуллангани боис 2013 йилдан буён Ўзбекистон ҳуқуқ-тартибот идоралари томонидан халқаро қидирувда бўлган.
2021 йилда Эшонқулов Россия ФХХ ходимлари томонидан қўлга олинган.
«Шу билан бирга, Россия томонининг уни ўз ватанига экстрадиция қилишга бўлган уринишлар Инсон ҳуқуқлари бўйича Европа суди томонидан блокланган», — дейилади хабарда.
Бундан олдин Хоразмда Суриядаги жангарилар сафига қўшилишни режалаштирган 4 нафар йигит ушлангани, ўзбекистонлик фуқаро МДҲ давлатларидан бирида қўпорувчилик ҳаракатини содир этмоқчи бўлгани аниқлангани, Тошкентда Сурияга бориб, жангарилар сафига қўшилишни режалаштирган талаба ва икки нафар мактаб ўқувчиси ушлангани тўғрисида хабар берилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)