Россиянинг Ростов вилоятида яшовчи 72 ёшли аёл ҳарбийлар ҳақида ёлғон хабарлар тарқатганликда айбланиб қамалди. Бу ҳақда “Коммерсант” нашри хабар берди.
Шахтинск шаҳар суди Евгения Майборода исм шарифли 72 ёшли аёлни “ВКонтакте” ижтимоий тармоғида улашган иккита пост учун беш ярим йилга озодликдан маҳрум қилган.
Аёл сиёсий нафрат ва оммавий тарзда экстремизмга чақириқлар билан Россия армияси ҳақида сохта маълумотлар тарқатишда айбдор деб топилган.
Майборода ижтимоий тармоқда улашган постларнинг бирида Украинадаги урушда ҳалок бўлган россиялик ҳарбийлар сони ҳақида маълумотлар бўлган. Иккинчисида у уруш тезроқ тугашини ва Украина тезроқ оёққа туришини хоҳлашини ёзган.
Аёл айбига қисман иқрор бўлган. Бироқ айбловнинг сиёсий характерда бўлганига эътироз билдирган. У хатти-ҳаракатини Украинадаги акаси Россия томонидан отилган снаряд туфайли ҳалок бўлгани билан изоҳлаган.
Маълум бўлишича, аёл охирги постини 2023 йил 8 март куни ёзган. 22 март куни аёлни аввалига уч сутка, сўнг тўрт суткага қамашган. 40 минг рубль жаримага тортишган.
Орадан бир ой ўтгач, 2023 йил 28 апрель куни аёлга нисбатан жиноят иши қўзғатилиб, у қамоққа олинган. Давлат қораловчиси кекса аёлга 6 йил қамоқ жазоси сўраган. Суд уни 5 ярим йилга озодликдан маҳрум этган.
Изоҳ (0)