Санкт-Петербургда Ўзбекистон фуқароси беш йилга қатъий тартибли ахлоқ тузатиш колониясида жазо ўташга ҳукм қилинди. Бу ҳақда Россия Тергов қўмитаси шаҳар бошқармасига таяниб, “78.ру” хабар берди.
Маълум қилинишича, ўзбекистонлик эркак жиноят кодексининг (ЖК) иккита моддаси бўйича айбдор деб топилган:
- Россия ЖК 111-моддаси 2-қисми “з” банди (қурол ишлатган ҳолда қасддан соғлиққа оғир шикаст етказиш);
- 322.1-моддаси 1-қисми (ноқонуний миграцияни ташкил этиш).
Тергов ва суд томонидан аниқланишича, маҳкум 14 февраль куни Димитров кўчасидаги уйлардан бирининг зинапоясида ватандошига пичоқ билан ҳужум қилган. Бундан ташқари, у 2023 йил март ойидан 2024 йил февралигача квартирасини икки ўзбекистонликка яшаш учун ноқонуний берган.
У ушбу шахсларнинг Россияда вақтинчалик яшаш жойи бўйича рўйхатдан ўтмаганини билган, яъни уларнинг Россияда ноқонуний бўлиши ва яшаши учун шароит яратган, дейилади хабарда.
Суд эркакка қамоқ жазосидан ташқари, у калтаклаган танишига маънавий зарар учун 500 минг рубль (салкам 59 миллион 500 сўм) миқдорида товон тўлашга мажбур қилди.
Изоҳ (0)